باجوڑ ماموند میں گرینڈ جرگہ، قبائلی عمائدین کا پاک فوج کے ساتھ کھڑے رہنے کا عزم

باجوڑ کے علاقے ماموند میں فرنٹیئر کور خیبر پختونخوا نارتھ کے زیراہتمام شاندار گرینڈ جرگے کا انعقاد کیا گیا، جس میں آئی جی ایف سی نارتھ، سول انتظامیہ، قبائلی عمائدین اور عوام کی بڑی تعداد نے شرکت کی۔

قبائلیوں کا وطن سے وفاداری کا اعادہ

جرگے کے دوران بتایا گیا کہ خوارج کی موجودگی کی اطلاعات پر علاقے میں انٹیلی جنس بیسڈ آپریشنز جاری ہیں۔ اس موقع پر قبائلی عمائدین اور مشران نے وطن کی خاطر پاک فوج کے شانہ بشانہ کھڑے رہنے اور ہر قسم کی قربانیاں دینے کے عزم کو دہرایا۔

پاک فوج کی قربانیوں کو خراج تحسین

شرکا نے پاک فوج کی جانب سے امن کے قیام کے لیے دی گئی لازوال قربانیوں کو زبردست خراجِ تحسین پیش کیا۔ جرگے کے دوران عوام نے بھی پاکستان اور پاک فوج کے حق میں پرجوش نعرے بلند کیے، جس سے ماحول حب الوطنی کے جذبے سے سرشار رہا۔

عوام کی جانب سے شکریہ

جرگے میں قبائلی عمائدین اور عوام نے ٹی ڈی پیز کی بروقت واپسی اور جرگے کے کامیاب انعقاد پر پاک فوج کا شکریہ ادا کیا۔ شرکا نے اس عزم کا اظہار کیا کہ امن کے سفر کو آگے بڑھانے میں وہ ہمیشہ ریاستی اداروں کے ساتھ کھڑے رہیں گے۔