حماد اظہر کا این اے 129 سے الیکشن نہ لڑنے کا اعلان، ٹکٹ چودھری ارسلان ظہیر کو دینے کا فیصلہ

پاکستان تحریک انصاف کے رہنما حماد اظہر نے قومی اسمبلی کے حلقہ این اے 129 سے الیکشن نہ لڑنے کا باقاعدہ اعلان کر دیا ہے۔ سماجی رابطے کی سائٹ ایکس پر جاری بیان میں انہوں نے کہا کہ اس نشست کے لیے پارٹی ٹکٹ چودھری ارسلان ظہیر کو دیا جا رہا ہے۔ ان کی انتخابی مہم کی انچارج ان کی ہمشیرہ ہوں گی۔

خاندانی وابستگی اور حمایت

حماد اظہر نے وضاحت کی کہ یہ نشست دراصل ان کے والد مرحوم میاں اظہر کی خالی ہونے والی نشست ہے اور فیصلہ کیا گیا ہے کہ ان کے بھانجے چودھری ارسلان ظہیر کو یہاں سے الیکشن لڑایا جائے۔ انہوں نے بتایا کہ ارسلان ظہیر ان کے والد اور ان کی ماضی کی انتخابی مہم کا حصہ رہے ہیں اور اس مرتبہ بھی کامیابی حاصل کریں گے۔

امیدوار کا تعارف

پی ٹی آئی رہنما نے کہا کہ ارسلان ظہیر پارٹی دورِ حکومت میں لاہور فروٹ اور سبزی منڈی کمیٹی کے چیئرمین رہ چکے ہیں اور ایک قابل و ہونہار نوجوان ہیں۔ ان کے والد 2020 میں کوویڈ کے باعث انتقال کر گئے تھے جس کے بعد میاں اظہر مرحوم نے ان کی سرپرستی کی اور انہیں اپنا دوسرا بیٹا تصور کرتے تھے۔

انتخابی مہم سے دوری کی وجوہات

حماد اظہر نے کہا کہ ان کے لیے انتخابی مہم میں فعال طور پر حصہ لینا اور بعد ازاں نشست جیت کر اسمبلی میں جانا ممکن نہیں ہے، اسی لیے انہوں نے یہ فیصلہ کیا ہے۔ ان کا کہنا تھا کہ چودھری ارسلان ظہیر پر 9 مئی کے کسی جعلی مقدمے کا بوجھ بھی نہیں، کیونکہ وہ اس روز ملک سے باہر تھے۔ اس لیے ان کے الیکشن جیتنے کے بعد جبری نااہلی کا سوال ہی پیدا نہیں ہوتا۔