پاکستان اور متحدہ عرب امارات کے درمیان اہم پیشرفت سفارتی و سرکاری پاسپورٹ ہولڈرز کیلئے ویزا فری انٹری کا باضابطہ آغاز

اسلام آباد: پاکستان اور متحدہ عرب امارات کے درمیان سفارتی تعلقات میں ایک بڑی پیشرفت سامنے آئی ہے، جہاں یو اے ای نے پاکستانی سفارتی اور سرکاری پاسپورٹ ہولڈرز کو ویزا فری داخلے کی سہولت باقاعدہ طور پر فعال کر دی ہے۔ یہ اقدام دونوں ممالک کے درمیان بڑھتے ہوئے باہمی اعتماد اور قریبی روابط کا عملی مظہر ہے۔

اس اہم فیصلے کا اعلان پاکستان کے نائب وزیراعظم اور وزیر خارجہ اسحاق ڈار نے سوشل میڈیا پلیٹ فارم ’ایکس‘ (سابقہ ٹوئٹر) پر اپنے بیان میں کیا۔ انہوں نے بتایا کہ یہ معاہدہ 24 جون 2025 کو ابوظہبی میں متحدہ عرب امارات کے نائب وزیراعظم اور وزیر خارجہ شیخ عبداللہ بن زاید النہیان سے ملاقات کے دوران طے پایا تھا۔

اس ملاقات میں دونوں وزرائے خارجہ نے ایک مفاہمتی یادداشت (MoU) پر دستخط کیے تھے، جس کے تحت سفارتی اور سرکاری پاسپورٹ رکھنے والے شہریوں کو ویزے کی شرط سے استثنیٰ حاصل ہونا تھا۔ معاہدے کے مطابق یہ سہولت دستخط کے 30 دن بعد نافذ العمل ہونا تھی، اور اب 25 جولائی 2025 سے مکمل طور پر نافذ ہو چکی ہے۔

اسحاق ڈار کے مطابق اب پاکستانی سفارتی و سرکاری پاسپورٹ رکھنے والے افراد متحدہ عرب امارات میں بغیر ویزا داخل ہو سکتے ہیں، جب کہ اس کے بالمقابل یو اے ای کے سفارتی و سرکاری پاسپورٹ ہولڈرز کو بھی پاکستان کے تمام بین الاقوامی ہوائی اڈوں پر ویزا فری انٹری کی سہولت حاصل ہو گی۔

یہ فیصلہ دونوں ممالک کے درمیان سرکاری سطح پر روابط کو مزید مضبوط بنانے میں مددگار ثابت ہوگا اور دوطرفہ سفارتی تعاون میں ایک نئی جہت کا اضافہ کرے گا۔