عمران خان نے نے سلمان اکرم راجا کا استعفیٰ مسترد کر دیا، سیاسی کمیٹی کا اجلاس آج دوبارہ طلب

پاکستان تحریک انصاف کے رہنما نعیم حیدر پنجوتھا نے دعویٰ کیا ہے کہ بانی پی ٹی آئی نے پارٹی کے وکیل سلمان اکرم راجا کا استعفیٰ منظور نہیں کیا اور انہیں ہدایت کی ہے کہ وہ کام جاری رکھیں۔

بانی پی ٹی آئی کی ہدایات

اڈیالہ جیل کے باہر میڈیا سے گفتگو کرتے ہوئے سلمان اکرم راجا نے بھی تصدیق کی کہ بانی پی ٹی آئی نے ان کا استعفیٰ منظور کرنے سے انکار کر دیا ہے۔ ان کا کہنا تھا کہ “خان صاحب نے کہا ہے کہ میں کام جاری رکھوں، اسی وجہ سے آج شام سیاسی کمیٹی کا اجلاس دوبارہ ہوگا، جس میں آئندہ کے لائحہ عمل پر بات کی جائے گی۔”

اپوزیشن لیڈر اور قانونی محاذ

سلمان اکرم راجا نے کہا کہ قومی اسمبلی میں اپوزیشن لیڈر عمر ایوب اور سینیٹ میں اپوزیشن لیڈر شبلی فراز ہیں، جو عدالتوں میں اپنے مقدمات خود لڑ رہے ہیں۔ انہوں نے بتایا کہ قانونی محاذ پر پارٹی قیادت اپنی جدوجہد جاری رکھے ہوئے ہے۔

محمود خان اچکزئی کا نام زیر غور

راجا نے مزید کہا کہ قومی اسمبلی کے حوالے سے بانی پی ٹی آئی نے محمود خان اچکزئی کا نام دوبارہ دہرایا ہے۔ انہوں نے کہا کہ پارٹی کی سیاسی کمیٹی بانی پی ٹی آئی کی ہدایات کی روشنی میں انتخابات اور آئندہ سیاسی فیصلوں کے بارے میں حتمی رائے قائم کرے گی۔

پس منظر

واضح رہے کہ گزشتہ چند روز سے تحریک انصاف کی صفوں میں اندرونی اختلافات اور قیادت کے بعض فیصلوں پر سوالات اٹھ رہے تھے۔ سلمان اکرم راجا کے استعفیٰ کی خبریں بھی انہی اختلافات کے تناظر میں سامنے آئی تھیں، تاہم بانی پی ٹی آئی کی مداخلت کے بعد یہ معاملہ وقتی طور پر ختم ہو گیا ہے۔