افغان دھڑوں کو امن عمل نتیجہ خیز بنانے کیلئے فوری اقدامات کرنا ہوں گے، شاہ محمود قریشی

وزیرخارجہ شاہ محمود قریشی کا کہنا ہے کہ پاکستان خطے میں قیام امن کیلئے افغانستان کے امن کو ناگزیر سمجھتا ہے، افغان دھڑوں کو مل بیٹھ کر، مذاکرات کے ذریعے امن عمل نتیجہ خیز بنانے کیلئے فوری اقدامات کرنا ہوں گے۔

وزیر خارجہ مخدوم شاہ محمود قریشی سے ایرانی وزیرخارجہ کے نمائندہ خصوصی برائے افغانستان محمد ابراہیم طاہریان فرد نے وفد کے ہمراہ وزارتِ خارجہ میں ملاقات کی جس میں دو طرفہ تعلقات ،افغان امن عمل ،خطے میں امن و امان کی صورتحال سمیت باہمی دلچسپی کے امور پر تبادلہ خیال کیا گیا۔

وزیر خارجہ نے ایرانی وفد کو وزارتِ خارجہ آمد پر خوش آمدید کہا ،وزیر خارجہ نے ایران میں صدارتی انتخابات کے کامیاب انعقاد پر ایرانی قیادت اور ایرانی عوام کو مبارکباد دی۔ وزیر خارجہ نے پاکستانی قیادت کی جانب سے ایران کے نومنتخب صدر سید ابراہیم رئیسی کیلئے نیک خواہشات کا اظہار کیا ۔ شاہ محمود قریشی نے کہاکہ گذشتہ چند برسوں میں پاکستان اور ایران کے مابین گہرے برادرانہ تعلقات مزید مستحکم ہوئے ہیں۔

انہوں نے کہاکہ دو طرفہ تعلقات کے استحکام میں ایران کے وزیر خارجہ جواد ظریف صاحب کا کردار قابل تحسین ہے۔ انہوں نے کہاکہ پاکستان، خطے میں قیام امن کیلئے افغانستان کے امن کو ناگزیر سمجھتا ہے، پاکستان، شروع سے اس موقف کا حامی رہا ہے کہ افغان مسئلے کا کوئی فوجی حل نہیں ہے۔انہوں نے کہاکہ ضرورت اس امر کی ہے کہ افغان قیادت میں، افغانوں کیلئے قابل قبول، جامع مذاکرات کے زریعے افغان مسئلے کا دیرپا سیاسی حل نکالا جائے۔

اپنی بات جاری رکھتے ہوئے شاہ محمود قریشی  نے کہاکہ افغانستان میں بدامنی کے باعث پاکستان اور ایران دونوں متاثر ہوئے ہیں۔وزیر خارجہ نے افغانستان میں قیام امن کیلئے ایران کی کاوشوں کو سراہا۔انہوں نے کہاکہ افغانستان میں بڑھتی ہوئی شدت پسندی، تشویش کا باعث ہے، پر تشدد واقعات میں اضافہ، امن مخالف قوتوں (اسپائیلرز) کو تقویت دینے کا باعث بن سکتا ہے۔

وزیر خارجہ نے کہاکہ عالمی برادری کی حمایت کو غنیمت جانتے ہوئے، افغان دھڑوں کو مل بیٹھ کر، مذاکرات کے ذریعے، افغان امن عمل کو نتیجہ خیز بنانے کیلئے فوری اقدامات کرنا ہوں گے۔ انہوں نے کہاکہ افغانستان میں قیام امن سے خطے میں روابط کے فروغ، تجارتی سرگرمیوں میں اضافے، افغان مہاجرین کی وطن واپسی اور علاقائی استحکام میں معاونت ملے گی۔

ایرانی وزیر خارجہ کے نمائندہ خصوصی برائے افغانستان ابراہیم طاہریان فرد نے وزیر خارجہ کا شکریہ ادا کرتے ہوئے افغانستان میں قیام امن کیلئے مشترکہ کاوشیں بروئے کار لانے کا عندیہ دیا۔