عراق، ایران اور امریکہ کے درمیان توازن برقرار رکھنا چاہتا ہے: فواد حسین

عراقی وزیر خارجہ فواد حسین نے کہا ہے کہ ان کا ملک ایران اور امریکہ کے درمیان اپنے تعلقات میں توازن برقرار رکھنے کے لیے کوشاں ہے۔

انہوں نے تسلیم کیا کہ امریکہ نے عراق پر ایران سے گیس کی درآمد روکنے کے لیے دباؤ ڈالا ہے، تاہم بغداد اپنے سٹریٹجک مفادات کو مدنظر رکھتے ہوئے اس معاملے پر محتاط حکمت عملی اپنا رہا ہے۔

العربیہ کو دیے گئے ایک انٹرویو میں فواد حسین نے کہا کہ عراق، واشنگٹن کے ساتھ اپنے سٹریٹجک مذاکرات جاری رکھنے کا خواہاں ہے اور نئی امریکی انتظامیہ کے ساتھ معاملات طے کرنے میں کسی قسم کی پریشانی محسوس نہیں کرتا۔

انہوں نے مزید کہا کہ عراق خطے میں استحکام کے لیے اہم کردار ادا کرنا چاہتا ہے اور کسی بھی تنازع کا حصہ بننے کے بجائے سفارتی راستے کو ترجیح دیتا ہے۔

عراقی وزیر خارجہ کا یہ بیان ایسے وقت میں سامنے آیا ہے جب امریکہ مشرق وسطیٰ میں ایران کے اثر و رسوخ کو کم کرنے کی کوشش کر رہا ہے اور عراق پر اقتصادی و سفارتی دباؤ بڑھا رہا ہے۔

اس تناظر میں، بغداد کی پالیسی خطے میں توازن اور خودمختاری کو یقینی بنانے کے لیے اہم سمجھی جا رہی ہے۔