اے این پی کی آل پارٹیز کانفرنس کا مشترکہ اعلامیہ، مسلم لیگ (ن) اور پیپلز پارٹی کے رہنماؤں نے دستخط نہ کیے

عوامی نیشنل پارٹی (اے این پی) کے زیر اہتمام ہونے والی آل پارٹیز کانفرنس (اے پی سی) کا مشترکہ اعلامیہ جاری کر دیا گیا، تاہم مسلم لیگ (ن) کے سینیٹر عرفان صدیقی، وفاقی وزیر طارق فضل چوہدری اور پیپلز پارٹی کے رہنما نیئر بخاری نے اس پر دستخط نہیں کیے۔

اعلامیہ پر اختلافات
اجلاس کے دوران اعلامیہ پڑھا جا رہا تھا تو مسلم لیگ (ن) اور پیپلز پارٹی کے رہنما اجلاس سے اٹھ کر چلے گئے۔ سینیٹر عرفان صدیقی کا کہنا تھا کہ یہ مطالبات ہمارے نہیں بلکہ آپ کے ہیں، لہٰذا ہم اس کی توثیق نہیں کر سکتے۔

اعلامیہ کے نکات
اے پی سی اعلامیہ میں دہشت گردی، انتہا پسندی اور بدامنی کی ہر شکل کی شدید مذمت کرتے ہوئے ان کے مکمل خاتمے کے لیے جامع اقدامات پر زور دیا گیا۔ اعلامیہ کے مطابق غیر قانونی مسلح جتھوں کا فوری خاتمہ اور عوام کے جان و مال کا تحفظ یقینی بنایا جائے۔
اس کے ساتھ ہی 18 ویں آئینی ترمیم پر اس کی اصل روح کے مطابق عمل درآمد، این ایف سی ایوارڈ پر مکمل عملدرآمد اور لاپتہ افراد کو عدالتوں میں پیش کرنے کا مطالبہ کیا گیا۔

سیاسی و سماجی مطالبات
کانفرنس کے اعلامیہ میں کہا گیا کہ سیاسی قیدیوں کو رہا کیا جائے، سیاسی سرگرمیوں کے لیے آزادانہ ماحول فراہم کیا جائے، میڈیا پر پابندیاں ختم کی جائیں اور پیکا جیسے قوانین کو مسترد کیا جائے۔ مزید یہ کہ پاکستان کو غیر ملکی جنگوں میں ملوث کرنے سے گریز کیا جائے اور خیبر پختونخوا کے سیلاب متاثرہ اضلاع کو آفت زدہ قرار دے کر امدادی پیکج دیا جائے۔

نیشنل ڈائیلاگ کی تجویز
پاکستان مسلم لیگ (ن) نے اے این پی کی نیشنل ڈائیلاگ کی تجویز سے اتفاق کیا۔ سینیٹر عرفان صدیقی نے پیپلز پارٹی کی کمیٹی بنانے کی تجویز کی بھی حمایت کرتے ہوئے کہا کہ وہ خود یہ تجویز وزیراعظم شہباز شریف کے سامنے رکھیں گے۔

عرفان صدیقی کی گفتگو
سینیٹر عرفان صدیقی نے کہا کہ صوبے وفاق کا تاج ہیں، پنجاب کو گالی دینے سے مسائل حل نہیں ہوں گے۔ انہوں نے کہا کہ شکایات چھوڑ کر پاکستان کو ایک قومی نقطہ نظر سے دیکھنا ہوگا۔ ان کا کہنا تھا کہ آئین ہم سب کا ہے اور اس پر کسی کو کلہاڑا نہیں چلانے دیں گے۔

انہوں نے کہا کہ اگر ملک میں مارشل لا ہوتا تو آج اسلام آباد میں اے پی سی کے اجلاس میں اس طرح کی گفتگو کی آزادی میسر نہ آتی۔ ان کا مزید کہنا تھا کہ فوج وفاق اور اس کی ہر اکائی کی محافظ ہے، جس نے پانچ گنا بڑے دشمن کو شکست دی، اس کا جشن منانا بھی پاکستانیت ہے۔