ڈیرہ اسماعیل خان میں آپریشن،میجر سبطین حیدر وطن پر نثار، 7 دہشت گرد بھی ہلاک

ڈیرہ اسماعیل خان کے علاقے درابن میں سیکیورٹی فورسز نے خفیہ اطلاع پر دہشت گردوں کے خلاف بھرپور کارروائی کرتے ہوئے سات خوارج کو جہنم واصل کر دیا۔ پاک فوج کے شعبۂ تعلقاتِ عامہ (آئی ایس پی آر) کے مطابق، کارروائی اس وقت کی گئی جب انڈین پراکسی فتنہ الخوارج سے تعلق رکھنے والے دہشت گردوں کی موجودگی کی اطلاع ملی۔

دہشت گردوں کی فائرنگ اور جوابی کارروائی
فورسز کے علاقے کو گھیرنے پر دہشت گردوں نے شدید فائرنگ کی، تاہم پاکستانی جوانوں نے بہادری کا مظاہرہ کرتے ہوئے جوابی کارروائی میں تمام دہشت گردوں کو انجام تک پہنچا دیا۔ آئی ایس پی آر کے مطابق، مارے گئے دہشت گرد سیکیورٹی فورسز، قانون نافذ کرنے والے اداروں اور عام شہریوں پر حملوں میں ملوث تھے اور وہ ملک میں مزید دہشت گردی کی منصوبہ بندی کر رہے تھے۔

اسلحہ و گولہ بارود برآمد، کلیئرنس آپریشن جاری
آپریشن کے دوران دہشت گردوں سے بھاری مقدار میں اسلحہ اور گولہ بارود بھی برآمد کیا گیا۔ علاقے میں کلیئرنس آپریشن جاری ہے تاکہ کسی بھی ممکنہ خطرے کا خاتمہ کیا جا سکے۔

میجر سبطین حیدر کی شہادت — بہادری کی نئی مثال
آئی ایس پی آر کے مطابق، کارروائی کے دوران کوئٹہ سے تعلق رکھنے والے 30 سالہ میجر سبطین حیدر نے وطن کے دفاع میں بہادری اور عزم کی مثال قائم کی۔ وہ فرنٹ لائن پر اپنے دستے کی قیادت کرتے ہوئے دشمن کا ڈٹ کر مقابلہ کرتے رہے اور مادرِ وطن پر قربان ہو گئے۔

پاک فوج کا عزم: آخری دہشت گرد کے خاتمے تک جنگ جاری
فوجی ترجمان نے کہا کہ سیکیورٹی فورسز بھارتی حمایت یافتہ دہشت گردوں کے خاتمے کے لیے پرعزم ہیں۔ پاک فوج کے بہادر سپوتوں کی قربانیاں قوم کے حوصلے مزید بلند کر رہی ہیں، اور ہم آخری خارجی کے خاتمے تک اپنی جدوجہد جاری رکھیں گے۔