نشانہ بازی میں مہارت فوجی تربیت کا بنیادی جزو ہے:فیلڈ مارشل عاصم منیر

فیلڈ مارشل جنرل سید عاصم منیر نے کہا ہے کہ شوٹنگ اور نشانہ بازی میں مہارت پاک فوج کی تربیت اور پیشہ ورانہ صلاحیتوں کا بنیادی جزو ہے، اسے ہمیشہ اعلیٰ معیار پر برقرار رکھنا ضروری ہے۔ انہوں نے جہلم میں منعقدہ 45ویں پاکستان آرمی رائفل ایسوسی ایشن سینٹرل میٹ کی اختتامی تقریب میں شرکت کے دوران جوانوں کی کارکردگی کو سراہا۔

 پی اے آر اے سنٹرل میٹ کی اختتامی تقریب
پاک فوج کے شعبہ تعلقات عامہ (آئی ایس پی آر) کے مطابق 45ویں پاکستان آرمی رائفل ایسوسی ایشن سینٹرل میٹ کی اختتامی تقریب جہلم میں منعقد ہوئی، جس میں فیلڈ مارشل جنرل سید عاصم منیر نے بطورِ مہمانِ خصوصی شرکت کی۔ اس مقابلے میں پاک فوج، پاک فضائیہ، پاک بحریہ، سول آرمڈ فورسز اور صوبائی ٹیموں نے بھرپور شرکت کی۔ تقریباً دو ہزار سے زائد شوٹرز نے مختلف کیٹیگریز میں حصہ لیا۔

پاک فوج کی نمایاں کارکردگی
45ویں پی اے آر اے سنٹرل میٹ کے دوران پاک فوج نے تیسری انٹر سروسز کامبیٹ شوٹنگ چیمپئن شپ 2025 جیت لی۔ پاک فوج نے چاروں انٹر سروسز میچز میں کامیابی حاصل کی۔ پنجاب رجمنٹ نے یونٹ فائرنگ پروفیشنسی میچ گروپ-ون میں پہلی پوزیشن حاصل کی۔ پنجاب رجمنٹ کے سپاہی محمد عرفان کو “ماسٹر ایٹ آرمز” قرار دیا گیا جبکہ آرمی مارکس مین شپ یونٹ کے نائب صوبیدار عمر فاروق نے “آرمی ہنڈرڈ رائفل میچ ٹرافی” اپنے نام کی۔

فیلڈ مارشل کا خطاب اور خراجِ تحسین
اختتامی تقریب سے خطاب کرتے ہوئے فیلڈ مارشل سید عاصم منیر نے شرکاء کی بہترین کارکردگی کو سراہا اور کہا کہ شوٹنگ میں مہارت ہر سپاہی کے لیے ایک بنیادی اور لازمی صلاحیت ہے۔ انہوں نے کہا کہ پاک فوج کے جوانوں کی پیشہ ورانہ مہارت اور تربیت ہی دفاعِ وطن کی اصل بنیاد ہے۔

ملٹری کالج جہلم کی صد سالہ تقریبات
تقریب کے بعد فیلڈ مارشل عاصم منیر نے ملٹری کالج جہلم کی صد سالہ تقریبات میں بھی شرکت کی۔ انہوں نے کالج کی “سینٹینری یادگار” اور “کالج میوزیم” کا افتتاح کیا اور ادارے کی سو سالہ خدمات کو خراجِ تحسین پیش کیا۔
آرمی چیف نے کہا کہ ملٹری کالج جہلم نے قیادت، نظم و ضبط اور حب الوطنی کو فروغ دینے میں کلیدی کردار ادا کیا۔ انہوں نے یادگارِ شہداء پر پھول چڑھائے۔
اس موقع پر کور کمانڈر راولپنڈی اور آئی جی ٹریننگ اینڈ ایویلیوایشن نے فیلڈ مارشل کا استقبال کیا۔