انگلینڈ کی ”بی“ ٹیم کیخلاف پاکستان کی بدترین کارکردگی پر مصباح الحق مایوس

پاکستان کرکٹ ٹیم کی جانب سے انگلینڈ کی ”بی“ ٹیم کیخلاف بدترین کارکردگی پر ہیڈ کوچ مصباح الحق نے بھی انتہائی مایوسی کا اظہار کیا ہے۔

مصباح الحق نے پاکستانی ٹیم کی بدترین شکست پر ردعمل کا اظہار کرتے ہوئے کہا کہ اس کارکردگی کا دفاع نہیں کیا جاسکتا، تیسرے ون ڈے میچ میں فتح کا موقع ہاتھ آگیا تھا مگر ہدف کا دفاع نہیں کرسکے، سب سے بڑا مسئلہ فیلڈنگ کا رہا۔

مصباح الحق نے کہا کہ جنوبی افریقہ کیخلاف سیریز میں اچھا کھیلے اور درست سمت میں گامزن تھے، انگلینڈ میں حالیہ سیریز کے بعد اب لگ رہا ہے وہیں کھڑے ہیں، یہ کارکردگی بطور ہیڈ کوچ میرے میرے لیے سخت تشویش کا باعث ہے، شکست کے بعد شکست کا صرف کھلاڑیوں یا کوچز کو ذمہ دار نہیں ٹھہرایا جاسکتا، یہ ٹیم کی ناکامی ہے۔

ہیڈ کوچ کا کہنا تھا کہ اگر کھلاڑی حکمت عملی کے مطابق پرفارم نہیں کرپاتے تو جتنے ذمہ دار وہ ہیں، اتنے کوچز بھی ہیں، سیریز میں بولرز بجھے بجھے نظر آئے، اگر انہوں نے پرفارم کیا تو بھی فیلڈرز نے ساتھ نہیں دیا، محدود اوورز کی کرکٹ میں 7 یا 8 کے رن ریٹ سے کھیلنا مشکل نہیں ہوتا۔

اپنی بات جاری رکھتے ہوئے مصباح الحق کا کہنا تھا کہ اس لئے وکٹیں حاصل کرتے رہنے کی ضرورت ہوتی ہے، فیلڈرز کیچ چھوڑیں تو رنز روکنا مشکل ہوجاتا ہے، یہ تیسرے ون ڈے میچ میں ہوا، اپنی غلطیاں سدھارنے کی کوشش کریں گے۔