ایران کے صدر ابراہیم رئیسی اور دیگر اعلیٰ شخصیات کی شہادت پر آج پاکستان میں سوگ

کابینہ ڈویژن کی جانب سے ایرانی صدر اور دیگر اعلیٰ سرکاری حکام کی شہادت کے تناظر میں آج بروز منگل کو یوم سوگ منانے کا باقاعدہ نوٹیفکیشن جاری گیا تھا، ملک بھر میں قومی پرچم بھی سر نگوں ہے۔

صدر آصف زرداری نے ایرانی صدر ابراہیم رئیسی کے انتقال پر گہرے دکھ اور افسوس کا اظہار کیا اور جاں بحق افراد کے سوگواران سے دلی تعزیت کا اظہار کرتے ہوئے کہا ہے کہ صدر ابراہیم رئیسی امت مسلمہ کے اتحاد کے بڑے حامی تھے، عالم اسلام ایک عظیم رہنما سے محروم ہو گیا، پاکستان ایک عظیم دوست کو کھو دینے پر سوگوار ہے۔

وزیر اعظم شہباز شریف نے اپنے تعزیتی بیان میں کہا ہے کہ المناک نقصان پر پاکستانی قوم اور حکومت کی جانب سے ایران سے افسوس اور اظہار تعزیت کرتا ہوں، ابراہیم رئیسی ہمیشہ پاکستان اور اس کے عوام کو خاص مقام دیتے تھے۔

سابق وزیر اعظم نواز شریف، وزیر اعلیٰ پنجاب مریم نواز، سابق وزیر خارجہ بلاول بھٹو اور چیئرمین پاکستان تحریک انصاف بیرسٹر گوہر نے بھی ایران کے صدر اور ان کے رفقاء کے انتقال پر اظہار افسوس کیا۔

مزید خبروں کیلئے وزٹ کریں