14 جدید طیارےپاک فضائیہ کےسپرد،رافیل سےبہترجے ایف17 بلاک3 کی تیاری شروع

پاک فضائیہ نے ملکی دفاع کو مزید مضبوط اور ناقابل تسخیربنانے کے لئے ایک اور سنگ میل عبور کرلیا،14 جدید جے ایف 17 ڈبل سیٹ طیارے بھی پاک فضائیہ کے بیڑے میں شامل کر لئے گئے جب کہ جے ایف 17 تھنڈر بلاک 3 کی تیاری شروع کردی گئی ہے۔

پاکستان اور چین کے باہمی تعاون سے تیار کردہ جے ایف سیونٹین بلاک ٹو کے 14 ڈبل سیٹر طیارے آج پاک فضائیہ کے حوالے کیے گئے جو تربیت کیلئے بھی استعمال ہوںگے۔ ان طیاروں کی پاکستان ایئرفورس کے بیڑے میں شمولیت سے ملکی دفاع مزید مضبوط ہوگا۔ پاک فضائیہ کا جے ایف 17 تھنڈر بلاک 3 نئے ریڈار کے ساتھ آپریشنل ہوگا اور بھارت کے حاصل کردہ رافیل سے بہتر ہوگا۔

جے ایف 17 ڈبل سیٹر طیاروں کی پاک فضائیہ کے بیڑے میں شمولیت اورجے ایف 17 بلاک تھری کی تیاری کے آغاز کے حوالے سے تقریب کامرہ ایئر بیس پر ہوئی۔ چین کے سفیر نونگ رونگ نے تقریب سے خطاب کرتے ہوئے کہا کہ جے ایف 17 بلاک ٹو ڈوئل سیٹر کی پاک فضائیہ میں شمولیت کی مبارک باد دیتے ہیں، پاک فضائیہ بلاک تھری بہت اہم منصوبہ ہے، دفاعی پیداوار میں تعاون ہماری دوستی کی مثال ہے۔

ایئرچیف مارشل مجاہد انورخان نے کہا کہ آج جے ایف 17 بلاک بی کے ڈبل سیٹ طیاروں کی شمولیت ہورہی ہے، آج ہی کے روزجے ایف 17 بلاک 3 کی تیاری کی جانب بھی پیش رفت کررہے ہیں، اس اہم سنگ میل کو عبور کرنے میں مدد پر چین کے شکر گزار ہیں۔ واضح رہے کہ پاک فضائیہ کا جے ایف 17 تھنڈر بلاک 3 نئے ریڈار کے ساتھ آپریشنل ہوگا اور بھارت کے حاصل کردہ رافیل سے بہتر ہوگا۔

محدود دفاعی بجٹ کے باوجود پاکستان کا کامرہ کمپلیکس نومبر 2009 کے بعد سے اب تک 100 سے زائد ملکی ساختہ جے ایف17 بلاک ون اور بلاک ٹو طیارے بنا کر پاک فضائیہ کے حوالے کر چکا ہے۔ حالیہ پاک بھارت کشیدگی میں اس طیارے نے ملکی دفاع میں اہم کردار ادا کیا تھا اور ایل او سی پر بھارت کے ٹیکنالوجی میں برتر دو طیارے گرا کر پورے پاکستان کا سر فخر سے بلند کر دیا تھا۔