اسرائیل کے حوالے سے کوئی فیصلہ نہیں کیا، اتحادی ممالک کے ساتھ چل رہے ہیں: قائم مقام صدر یوسف رضا گیلانی

قائم مقام صدرِ مملکت سید یوسف رضا گیلانی نے کہا ہے کہ پاکستان نے اسرائیل کے حوالے سے کوئی فیصلہ نہیں کیا، ملک کی خارجہ پالیسی اتحادی ممالک کے ساتھ مشاورت سے آگے بڑھائی جا رہی ہے۔ پشاور میں پریس کانفرنس کرتے ہوئے انہوں نے کہا کہ وزیراعظم اس معاملے پر پارلیمنٹ کو اعتماد میں لیں گے۔

وزیراعظم اور فیلڈ مارشل امریکا گئے ہیں

یوسف رضا گیلانی کا کہنا تھا کہ یہ صرف اکیلے وزیراعظم کا فیصلہ نہیں ہوتا، “وزیراعظم اور فیلڈ مارشل امریکا گئے ہیں، وہاں تمام معاملات مشاورت سے طے ہوں گے”۔ انہوں نے کہا کہ اختلاف رائے جمہوریت کا حصہ ہے اور حکومت آئین کے مطابق فیصلے کرے گی۔

صوبوں کو حقوق دینے کے حق میں ہیں

قائم مقام صدر نے اپنی سابقہ حکومت کی کارکردگی کا حوالہ دیتے ہوئے کہا کہ “ہم نے اپنے دور میں آپریشن کیا اور 90 روز کے اندر متاثرین کو گھروں میں واپس بھیجا، ساتویں این ایف سی ایوارڈ کا اعلان گوادر میں کیا، ہم صوبوں کو زیادہ سے زیادہ حقوق دینے کے حق میں ہیں”۔ انہوں نے کہا کہ نئے صوبوں کی تشکیل کا طریقہ کار آئین میں واضح ہے۔

خارجہ پالیسی وفاقی حکومت کا اختیار

یوسف رضا گیلانی نے کہا کہ خارجہ پالیسی وفاقی حکومت کا اختیار ہے، “یہ وفاق طے کرے گا کہ ملک کی پالیسی کیا ہونی چاہیے”۔ انہوں نے واضح کیا کہ وہ غیر ضروری سیاسی تنازعات کو ہوا نہیں دینا چاہتے اور میڈیا پر ایسی خبریں نہیں بننے دیں گے جن سے محاذ آرائی بڑھے۔

بھارت کے ساتھ کشیدگی کا حوالہ

اپنے خطاب میں انہوں نے کہا کہ جب بھارت نے حملہ کیا تھا تو بلاول بھٹو نے بین الاقوامی سطح پر پاکستان کا مؤقف پیش کیا۔ “ہم نے ہمیشہ جمہوریت کو مضبوط کیا، اسمبلی توڑنے کا اختیار 58(2)(b) ختم کیا، تیسری بار وزیراعظم بننے کی شق ختم کی، جس کا فائدہ سب کو ہوا”۔