ناروے قابل تجدید توانائی کے شعبے میں پاکستان سے تعاون جاری رکھے گا، نارویجئن سفیر

اسلام آباد: وفاقی وزیر برائے توانائی عمر ایوب سے پاکستان میں ناروے کے سفیر کیجل گنار ایریکسن نے ملاقات کی ہے اور یقین دلایا ہے کہ ناروے قابل تجدید توانائی کے شعبے میں پاکستان سے تعاون جاری رکھے گا۔

وزارت توانائی کی جانب سے جاری بیان کے مطابق وفاقی وزیر برائے توانائی عمر ایوب سے پاکستان میں ناروے کے سفیر کیجل گنار ایریکسن نے اسلام آباد میں ملاقات کی جس میں توانائی کے شعبے سمیت دوطرفہ تعاون سے متعلق امور پر تبادلہ خیال کیا گیا۔

اس موقع پر عمر ایوب نے کہا کہ پاکستان میں قابل تجدیدتوانائی کے شعبے میں سرمایہ کاری کے وسیع مواقع موجود ہیں،مقامی وسائل سے توانائی کی پیداوارسے سستی بجلی میسر ہوگی۔ توانائی کے شعبے میں غیر ملکی کمپنیوں سے ٹیکنالوجی کی منتقلی کو بڑھانے کو ترجیح دی جائےگی۔

وفاقی وزیر کا مزید کہنا تھا کہ قابل تجدید توانائی کے منصوبوں کی تکمیل مسابقتی بولی کے ذریعے کی جائے گی، توانائی کے شعبے میں سرمایہ کاری کو فروغ دینے کیلئے شفافیت کو یقینی بنایا جائے گا، توانائی منصوبوں سے روزگار کے نئے مواقع پیدا ہوں گے۔

نارویجئین سفیر کیجل گنار ایریکسن نے اس موقع پر کہا کہ ناروے پاکستان کی قابل تجدید توانائی کے شعبے میں تعاون جاری رکھے گا، پاکستان کی قابل تجدید پالیسی قابل ستائش ہے۔