پاکستان کرپٹو کونسل کے قیام کا اعلان، وزیر خزانہ محمد اورنگزیب سربراہ مقرر

اسلام آباد: وزارت خزانہ نے پاکستان میں کرپٹو کرنسی اور بلاک چین ٹیکنالوجی کے فروغ کے لیے پاکستان کرپٹو کونسل کے قیام کا باضابطہ اعلان کر دیا ہے، جس کی سربراہی وزیر خزانہ محمد اورنگزیب کریں گے۔ اس حوالے سے جاری کردہ اعلامیے کے مطابق وزیر خزانہ کے چیف ایڈوائزر برائے پاکستان کرپٹو کونسل بلال بن ثاقب کو کونسل کا سی ای او تعینات کیا گیا ہے۔

وزارت خزانہ کے مطابق پاکستان کرپٹو کونسل ملک میں موثر پالیسی سازی، جدیدیت کے فروغ اور محفوظ مالیاتی نظام کے قیام میں اہم کردار ادا کرے گی۔ بلال بن ثاقب بلاک چین ٹیکنالوجی، سرمایہ کاری حکمت عملی اور ڈیجیٹل جدت میں اپنی مہارت کے ذریعے اس کونسل کی قیادت کریں گے۔

اعلامیے میں بتایا گیا کہ پاکستان کرپٹو کونسل کے بورڈ ممبران میں گورنر اسٹیٹ بینک آف پاکستان، چیئرمین سکیورٹیز اینڈ ایکسچینج کمیشن آف پاکستان (SECP)، وفاقی سیکریٹری قانون اور وفاقی سیکریٹری خزانہ شامل ہوں گے۔

کونسل کا مقصد کرپٹو کرنسی کے اپنانے کے لیے واضح اور مؤثر ضابطہ جاتی فریم ورک تشکیل دینا ہوگا۔ اس کے علاوہ کونسل عالمی کرپٹو اور بلاک چین تنظیموں سے روابط قائم کر کے عالمی بہترین روایات اپنانے کے لیے تجاویز مرتب کرے گی۔

بیان کے مطابق کونسل فنانشل ٹیکنالوجی (FinTech)، اسٹارٹ اپس، سرمایہ کاروں اور بلاک چین ڈیولپرز کے ساتھ اشتراک عمل کے ذریعے ذمہ دارانہ جدت کے فروغ پر کام کرے گی۔

کونسل صارفین کے تحفظ اور مالیاتی سلامتی کے لیے ایک مضبوط قانونی اور تعمیلی فریم ورک بھی تیار کرے گی تاکہ کرپٹو اثاثوں کی تجارت کو محفوظ بنایا جا سکے۔

وزارت خزانہ نے کہا کہ پاکستان کرپٹو کونسل کے قیام سے ملک میں مالیاتی اور تکنیکی ترقی کا نیا باب کھلے گا، جو بلاک چین ٹیکنالوجی اور ڈیجیٹل اثاثوں کے فروغ و ضابطہ کاری کی طرف ایک اہم پیش رفت ہے۔

اعلامیہ میں مزید کہا گیا کہ کونسل محفوظ اور مستحکم مالیاتی نظام کی تشکیل اور ڈیجیٹل معیشت کے فروغ میں کلیدی کردار ادا کرے گی۔