امریکا، یورپی یونین اور چین کے لئے اگست میں پاکستانی برآمدات میں ریکارڈ اضافہ

رواں مالی سال کے دوران اگست میں امریکا، یورپی یونین اور چین کو پاکستانی برآمدات میں بڑا اضافہ ریکارڈ ہوا، گزشتہ سال اگست کے مقابلے میں رواں سال چین کو برآمدات میں 109 فیصد کا اضافہ ہواہے۔

وزارت تجارت کی جانب سے جاری اعدادوشمار کے مطابق پاکستان کی امریکہ کو برآمدات 60 فیصد، سپین 60 فیصد اور ہالینڈ کو برآمدات میں 46 فیصد اضافہ ہوا، جب کہ افغانستان کو برآمدات میں 38فیصد، ڈنمارک 24، جنوبی کوریا کو 32 فیصد، انڈونیشیا کو 20 فیصد، سنگاپور 77 فیصد، چیک ری پبلک کو برآمدات میں 32 فیصد کمی ہوئی ہے۔

اعدادوشمار کے مطابق ہوم ٹیکسٹائل مردانہ ملبوسات، کاٹن فیبرک، چاول پھلوں سبزیوں کی برآمدات میں گزشتہ سال کی نسبت اضافہ دیکھنے میں آیا ہے جب کہ آلات جراحی، مچھلی اور اسے بنی مصنوعات، سیمنٹ خیمے اورلکڑی کی مصنوعات کی برآمدات میں کمی ہوئی، ہوم ٹیکسٹائل کی برآمدات 50 فیصد اضافے کے ساتھ 38 کروڑ 50 لاکھ ڈالر رہیں۔

وزارت تجارت کے مطابق مردانہ ملبوسات کی برآمدات 25 کروڑ 61 لاکھ 70 ہزار ڈالر سے بڑھ کر 37 کروڑ 71 لاکھ 40 ہزار ڈالرز رہیں اگست میں چاول کی برآمدات 43 فیصد اضافے کے ساتھ 14 کروڑ 20 لاکھ 50 ہزار ڈالرز، جرسیوں کی برآمدات 70 فیصد اضافے کے ساتھ 7 کروڑ 28 لاکھ 20 ہزار ڈالرز رہیں۔

سالانہ بنیادوں پر اگست میں پھلوں اور سبزیوں کی برآمدات میں 63 فیصد اضافہ ہوا اس کے علاوہ آلات جراحی کی برآمدات 4 فیصد، مچھلی اوراس سے بنی مصنوعات کی برآمدات 24 فیصد کم ہوئیں گزشتہ سال کی نسبت رواں سال اگست میں سیمنٹ کی برآمد میں 56 فیصد خیموں اور کینوس کی برآمدات 24 فیصد، لکڑی اور لکڑی سے بنی مصنوعات کی برآمدات میں 67 فیصد کی کمی ریکارڈ کی گئی۔