پاکستان عالم اسلام کا ناقابلِ تسخیر قلعہ ہے، فیلڈ مارشل عاصم منیر کا خصوصی پیغام

پاکستان کے 78 ویں یومِ آزادی کے موقع پر فیلڈ مارشل سید عاصم منیر نے خصوصی پیغام میں تمام اہلِ وطن کو مبارکباد پیش کی اور وطن کی خاطر قربانیاں دینے والے بزرگوں اور برصغیر کے مسلمانوں کو خراجِ تحسین پیش کیا۔ انہوں نے کہا کہ پاکستان عالمِ اسلام کا مضبوط اور ناقابلِ تسخیر قلعہ ہے، جو بین المذاہب ہم آہنگی اور مذہبی آزادی کی روشن مثال ہے، جہاں مذہبی اقلیتیں آج بھی ملکی ترقی میں اہم کردار ادا کر رہی ہیں۔

دہشتگردی کے خلاف قربانیاں اور پہلگام سانحہ
فیلڈ مارشل نے کہا کہ پاکستان نے دہشتگردی کے عفریت کو شکست دینے کے لیے بے پناہ جانی اور مالی قربانیاں دی ہیں۔ انہوں نے پہلگام کے افسوسناک سانحے کا ذکر کرتے ہوئے کہا کہ پاکستان نے نہ صرف اس واقعے کی شدید مذمت کی بلکہ شفاف عالمی تحقیقات کی پیشکش بھی کی، مگر بھارتی حکومت نے روایتی ہٹ دھرمی کا مظاہرہ کرتے ہوئے پاکستان کی شہری آبادی کو نشانہ بنایا۔

آپریشن “بُنْيَانٌ مَّرْصُوْص” اور بھارتی جارحیت کا جواب
انہوں نے کہا کہ قوم کی حمایت سے پاک فوج نے بھارتی جارحیت کا منہ توڑ جواب دیتے ہوئے “آپریشن بُنْيَانٌ مَّرْصُوْص” کیا، جو تاریخ میں افواجِ پاکستان کی بہادری، جرات اور ولولہ انگیز جذبے کی علامت بن چکا ہے۔

ملکی سلامتی اور خودمختاری کا واضح پیغام
فیلڈ مارشل نے واضح کیا کہ پاک فوج روایتی، غیر روایتی اور ہائبرڈ خطرات سے نمٹنے کے لیے پوری طرح لیس ہے۔ پاکستان خطے میں امن، ترقی اور خوشحالی چاہتا ہے، لیکن اپنی آزادی اور خودمختاری پر کوئی سمجھوتہ نہیں کرے گا۔ ملکی سالمیت کو نقصان پہنچانے کی کسی بھی مہم جوئی کا بلا جھجک فوری اور بھرپور جواب دیا جائے گا۔

کشمیر اور فلسطین کے مظلوم عوام سے یکجہتی
انہوں نے کہا کہ پاکستان، مقبوضہ جموں و کشمیر کے عوام کی جدوجہد آزادی کی مکمل حمایت جاری رکھے گا کیونکہ کشمیریوں کو حقِ خود ارادیت دلانا ہی مسئلے کا واحد منصفانہ اور پائیدار حل ہے۔ اسی طرح پاکستان فلسطین کے مظلوم عوام کے ساتھ کھڑا ہے اور عالمی برادری سے مطالبہ کرتا ہے کہ وہ فلسطینی عوام کے حقوق کے تحفظ کے لیے فوری اقدامات کرے۔

شہداء کو سلام اور وطن سے وفاداری کا عہد
فیلڈ مارشل سید عاصم منیر نے جدوجہد آزادی کے تمام شہداء کو سلام پیش کرتے ہوئے کہا کہ ان کی جرات، بہادری اور ایمان سے بھرپور عزم ہماری رہنمائی کا چراغ ہے۔ انہوں نے پاک فوج کی پیشہ ورانہ مہارت اور جنگی تیاری پر مکمل اعتماد کا اظہار کرتے ہوئے کہا کہ سرحدوں کی حفاظت کے لیے کسی قربانی سے دریغ نہیں کیا جائے گا اور تمام توانائیاں پاکستان کے استحکام اور ترقی کے لیے وقف کر دی جائیں گی۔