پاکستان نے کشمیر سے متعلق او آئی سی اجلاس کی قرارداد پربھارتی بیان مسترد کر دیا

اسلام آباد: پاکستان نے اسلامی تعاون تنظیم کی وزرائے خارجہ کونسل کے اجلاس سے متعلق بھارتی وزارتِ خارجہ کے بیان کو غیر منطقی قرار دیتے ہوئے مسترد کر دیا ہے۔

ترجمان دفتر خارجہ زاہد حفیظ چوہدری کی جانب سے جاری ایک بیان میں کہا گیا ہے کہ تنازع جموں وکشمیر کے بارے میں اسلامی تعاون تنظیم کے وزرائے خارجہ کی کونسل کے 47 ویں اجلاس کی قرارداد سے متعلق بھارتی وزارت خارجہ کا بیان غیرمنطقی، بلاجواز ہے، پاکستان اسے سختی سے مسترد کرتا ہے۔

زاہد حفیظ چودھری کا کہنا ہے کہ جموں وکشمیر اقوام متحدہ کی سلامتی کونسل کے ایجنڈے پر موجود عالمی طور پر مسلمہ قدیم ترین تنازعات میں سے ایک ہے۔ بھارت اقوام متحدہ کی سلامتی کونسل کی قراردادوں اور پاکستان کشمیریوں اور عالمی برادری کے ساتھ کئے گئے وعدوں پرعملدرآمد سے مسلسل راہ فرار اختیار کر رہا ہے، بھارتی ہٹ دھرمی کے باعث یہ تنازع تا حال حل طلب ہے۔

ترجمان دفتر خارجہ نے مزید کہا ہے کہ اسلامی تعاون تنظیم کی قرارداد بھارت کے اس غیرقانونی اور غیرمنطقی موقف کی تردید ہے کہ جموں وکشمیر اس کا داخلی معاملہ ہے۔ بھارت او آئی سی کی قرارداد میں ظاہر کی جانے والی عالمی برادری کی تشویش کو مسترد کرنے کی بجائے غیرقانونی زیرقبضہ جموں وکشمیر میں اپنی ریاستی دہشت گردی کا سلسلہ بند کرے۔