پاکستانیوں کا فلسطینیوں سے بھرپور اظہار یکجہتی،ملک بھر میں اسرائیل مخالف مظاہرے

مظلوم فلسطینیوں سے اظہار یکجہتی اور اسرائیل کی بربریت کے خلاف پاکستان بھر میں یوم یکجہتی فلسطین بھرپور طریقے سے منایا گیا، اسرائیلی جارحیت کے خلاف اسلام آباد، کراچی، لاہور، کوئٹہ اور پشاور سمیت ملک کے چپے چپے میں احتجاجی ریلیاں اور مظاہرے منعقد کیے گئے۔

وفاقی دارالحکومت میں اسپیکر قومی اسمبلی، چیئرمین سینیٹ، وفاقی وزراء اور اراکین پارلیمنٹ نے فلسطین سے اظہار یکجہتی کے لئے پارلیمنٹ ہاؤس کے سامنے مظاہرہ کیا، اس موقع پر چیئرمین سینیٹ صادق سنجرانی، اسپیکر اسد قیصر سمیت دیگر حکومتی شخصیات نے اپنے خطابات میں اسرائیلی مظالم کی پرزور الفاظ میں مذمت کرتے ہوئے عالمی برادری سے مطالبہ کیا کہ وہ فلسطینوں پر ڈھائے جانے والے مظالم اور اسرائیلی جارحیت ختم کرائیں۔

اپوزیشن لیڈر قومی اسمبلی شہباز شریف، ڈپٹی اسپیکر قومی اسمبلی قاسم خان سوری اور دیگر پارلیمنٹیرینز نے فلسطینیوں کے ساتھ اظہار یکجہتی کی قومی اسمبلی سے متفقہ طور پر منظور قرار اسلام آباد میں اقوام متحدہ کے نمائندہ کے پاس جمع کرائی اور مطالبہ کیا کہ اقوام متحدہ فلسطین کے تنازعہ کو سلامتی کونسل کی قراردادوں کے مطابق حل کرانے میں موثر کردار ادا کرے۔

راولپنڈی، اسلام آباد میں جماعت اسلامی، آل پارٹیز حریت کانفرنس، جمعیت علمائے اسلام، مجلس وحدت المسلمین، تحریک انصاف، پاکستان عوامی تحریک سمیت مختلف سیاسی، مذہبی ، تاجر تنظیموں نے فلسطینوں کے ساتھ بھرپور انداز میں یکجہتی کا اظہار کیا، لال حویلی میں عوامی اجتماع سے خطاب میں وزیر داخلہ شیخ رشید نےکہاکہ ایک نہ ایک دن مسئلہ کشمیر اور فلسطین ضرور حل ہوگا۔

شہر قائد کراچی میں عوام کی بڑی تعداد فلسطینی عوام سے یکجہتی کا اظہار کرتے ہوئے گھروں سے باہر نکل آئی، شہریوں نے فلسطین کے حق میں بینرز اور پوسٹرز بھی اٹھا رکھے تھے، جن پر مظلوم فلسطینیوں کے حق میں اور اسرائیل مخالف نعرے درج تھے۔مختلف تنظیموں اور سول سوسائٹی کے تحت نکلنے والی ریلیاں مختلف علاقوں سے شروع ہوکر پریس کلب پر جمع ہوگئيں۔

احتجاجی ریلیوں اور مظاہروں میں مذہبی و سیاسی جماعتوں، سول سوسائٹی اور مختلف شعبہ ہائے زندگی کے افراد نے بڑی تعداد میں شرکت کی، پشاور میں بھی بڑا عوامی اجتماع  ہوا اور جمعیت علمائے اسلام کے تحت احتجاجی مظاہرے میں عوام نے بھر پور شرکت کی جبکہ لاہور میں بھی تحریک انصاف، جماعت اسلامی اور مختلف اداروں کے تحت الگ الگ ریلیاں نکالی گئیں۔

سوات میں ن لیگ کے صوبائی صدر امیر مقام کی قیادت میں احتجاجی مظاہرہ ہوا جبکہ فیصل آباد میں میڈيکل تنظيموں نے ریلی نکالی۔ ملتان، رحیم یار خان، بہاول نگر، خیبر، بنوں، چار سدہ، نصیر آباد، مٹیاری میں بھی عوامی ریلیاں ہوئیں اور فلسطین سے یکجہتی کا اظہار کیا گیا۔

آزاد کشمیر میں بھی فلسطینی بھائیوں سے اظہار یکجہتی کیلئے مظاہرہ کیا گيا جس میں وزیرا‏عظم آزاد کشمیر راجا فاروق حیدر اور ان کی کابینہ نے بھی شرکت کی۔ ریلیوں اور احتجاج میں مقبوضہ بیت المقدس اور فلسطین کی آزادی کے حق میں نعرے لگائے گئے جبکہ اسرائیلی ظلم و بربریت پر غم و غصے کا اظہار کیا گیا۔