پاکستان کا ابدالی میزائل کا کامیاب تجربہ، 450 کلومیٹر تک ہدف کو نشانہ بنانے کی صلاحیت

راولپنڈی: پاک فوج کے شعبہ تعلقات عامہ (آئی ایس پی آر) نے اعلان کیا ہے کہ پاکستان نے زمین سے زمین تک مار کرنے والے جدید میزائل کا کامیاب تجربہ کیا ہے، جو 450 کلومیٹر تک اپنے ہدف کو نشانہ بنانے کی صلاحیت رکھتا ہے۔

ترجمان پاک فوج کے مطابق یہ تجربہ مشق “انڈس” کے حصے کے طور پر کیا گیا، جس کا مقصد مسلح افواج کی عملی تیاری کو جانچنا اور میزائل کی جدید تکنیکی خصوصیات جیسے نیویگیشن سسٹم اور سمت تبدیل کرنے کی صلاحیت کا جائزہ لینا تھا۔

تربیتی تجربے کے دوران کمانڈر آرمی اسٹریٹجک فورسز کمانڈ، اسٹریٹجک پلانز ڈویژن، اور دیگر سینئر عسکری افسران کے علاوہ پاکستان کے اسٹریٹجک اداروں کے سائنسدانوں اور انجینئرز بھی موجود تھے، جنہوں نے اس تجربے کا مشاہدہ کیا۔

صدر مملکت، وزیر اعظم پاکستان، چیئرمین جوائنٹ چیفس آف اسٹاف کمیٹی اور تمام مسلح افواج کے سربراہان نے تجربے میں حصہ لینے والے افسران، سائنسدانوں اور انجینئرز کو کامیابی پر مبارکباد دی۔

رہنماؤں نے پاکستان کی اسٹریٹجک فورسز کی صلاحیتوں اور دفاعی تیاری پر مکمل اعتماد کا اظہار کیا اور کہا کہ یہ تجربہ ملکی سلامتی کے لیے اہم سنگِ میل ہے، جو دشمن کے عزائم کے خلاف مؤثر دفاعی حکمت عملی کا حصہ ہے۔