پاکستان کا دوٹوک مؤقف: فلسطین فلسطینیوں کا ہے، جنگ بندی اور امداد کی بحالی کا مطالبہ

اسلام آباد – ترجمان دفتر خارجہ شفقت علی خان نے ہفتہ وار پریس بریفنگ میں مختلف عالمی اور علاقائی امور پر پاکستان کے مؤقف کی وضاحت کی۔

فلسطین اور غزہ کی صورتحال

ترجمان نے کہا کہ فلسطینیوں کو اپنی زمین سے بے دخل کرنا انتہائی تشویشناک ہے اور پاکستان ایسی آزاد فلسطینی ریاست کی حمایت کرتا ہے جس کا دارالحکومت القدس ہو۔ انہوں نے غزہ میں مستقل جنگ بندی اور امدادی سامان کی بلارکاوٹ ترسیل کو یقینی بنانے پر زور دیا۔

شفقت علی خان نے اسرائیل کی جانب سے سیز فائر معاہدے کی خلاف ورزی کی مذمت کرتے ہوئے کہا کہ امدادی کاموں کو روکنا معاہدے کی خلاف ورزی ہے۔ انہوں نے عالمی برادری سے مطالبہ کیا کہ وہ اسرائیلی مظالم پر خاموشی توڑے اور جنگ بندی معاہدے پر عمل درآمد کرائے۔

پاکستان-چین تعلقات

ترجمان دفتر خارجہ نے کہا کہ صدر آصف علی زرداری نے اپنے دورہ چین میں پاکستان کی ون چائنہ پالیسی کا اعادہ کیا۔ اس دوران دونوں ممالک نے دفاعی تعاون کا جائزہ لیا اور علاقائی توازن پر زور دیا۔

افغانستان کی صورتحال

غیر قانونی مقیم افغان شہریوں کی واپسی کے حوالے سے ترجمان نے کہا کہ یہ اقدام غیر قانونی نہیں بلکہ پاکستان کا خودمختارانہ فیصلہ ہے۔ انہوں نے بتایا کہ پاکستان افغان شہریوں کی تیسرے ملک منتقلی کے حوالے سے متعلقہ ممالک سے رابطے میں ہے۔

شفقت علی خان نے افغانستان میں دہشت گرد گروہوں کی موجودگی پر تشویش کا اظہار کرتے ہوئے کہا کہ افغان حکومت اپنی سرزمین پر موجود دہشت گرد عناصر کے خلاف کارروائی کرے۔

ترکیہ کے صدر کا متوقع دورہ پاکستان

ترجمان دفتر خارجہ نے کہا کہ ترکیہ کے صدر رجب طیب اردوان کے دورہ پاکستان کے حوالے سے بات چیت ابتدائی مراحل میں ہے، اور جلد ہی اس حوالے سے تفصیلات جاری کی جائیں گی۔

جرمنی میں پاکستانی سفارت خانے پر حملہ

انہوں نے کہا کہ ماضی میں جرمنی میں پاکستانی سفارت خانے پر حملہ اور قومی پرچم کی بے حرمتی ایک حساس معاملہ تھا، جس سے پاکستانی عوام کے جذبات مجروح ہوئے۔ ترجمان نے کہا کہ پاکستان اپنے سفارتی مشنز کی سیکیورٹی کی ذمہ داری لیتا ہے، اور اسی طرح جرمنی میں ہمارے سفارت خانے کا تحفظ جرمن وزارت خارجہ کی ذمہ داری تھی۔ اس معاملے پر جرمن حکومت سے رابطہ جاری ہے۔

کشمیر پر پاکستان کا مؤقف

ترجمان نے کہا کہ پاکستان کا کشمیر سے متعلق مؤقف کشمیری عوام کی امنگوں کے مطابق ہے اور پاکستان ہمیشہ کشمیریوں کے حقِ خودارادیت کی حمایت کرتا رہے گا۔ انہوں نے واضح الفاظ میں کہا: “کشمیر بنے گا پاکستان۔”

عافیہ صدیقی کی رحم کی اپیل

ترجمان دفتر خارجہ نے بتایا کہ امریکہ نے عافیہ صدیقی کی رحم کی اپیل مسترد کر دی ہے، تاہم مستقبل میں وہ دوبارہ درخواست دائر کر سکتی ہیں۔