پاکستان کی سیاسی و عسکری قیادت ایک پیج پر ہے، دہشت گردی کا مکمل صفایا کریں گے:وزیراعظم شہباز شریف

وزیراعظم شہباز شریف نے برطانیہ میں پاکستانی صحافیوں سے گفتگو کرتے ہوئے کہا کہ پاکستان کی سیاسی و عسکری قیادت خارجہ پالیسی سمیت تمام اہم معاملات پر ایک پیج پر ہے۔ ان کا کہنا تھا کہ وہ اور فیلڈ مارشل سید عاصم منیر ہر قومی مسئلے پر مشاورت کرتے ہیں، اقتصادی صورتحال کے حوالے سے بھی باہمی مشاورت کی جاتی ہے۔ شہباز شریف نے کہا کہ یہ ہم آہنگی جاری رہی تو ماضی کے نقصانات کا ازالہ ممکن ہوگا۔

بھارت کے خلاف کامیابی اور دفاعی معاہدہ

وزیراعظم نے کہا کہ افواجِ پاکستان نے بھارت کو سبق سکھایا جو ہمیشہ یاد رکھا جائے گا۔ فیلڈ مارشل سید عاصم منیر کی قیادت میں معرکۂ حق میں پاکستان نے تاریخی فتح حاصل کی اور پوری قوم افواج پاکستان کے پیچھے کھڑی تھی۔ انہوں نے مزید کہا کہ پاکستان اور سعودی عرب کے درمیان دفاعی معاہدہ دہائیوں پر محیط اعتماد کا مظہر ہے اور حرمین شریفین کی حفاظت کے لیے پاکستان کسی قربانی سے دریغ نہیں کرے گا۔

عالمی دورے اور امریکی صدر سے ملاقات

شہباز شریف نے نیویارک اور واشنگٹن کے دورے کو کامیاب قرار دیتے ہوئے کہا کہ اقوام متحدہ کی عمارت میں غزہ کی صورتحال پر اجلاس خوش آئند پیشرفت ہے، جس میں قطر، سعودی عرب، اردن اور مصر بھی شریک ہوئے۔ انہوں نے بتایا کہ امریکی صدر ڈونلڈ ٹرمپ سے انتہائی خوشگوار ماحول میں ملاقات ہوئی، جس میں فیلڈ مارشل عاصم منیر بھی موجود تھے۔ اس ملاقات میں دو طرفہ تعلقات کو مزید مضبوط بنانے کے عزم کا اعادہ کیا گیا۔

غزہ اور فلسطین کے مسئلے پر موقف

وزیراعظم نے کہا کہ غزہ میں 2023 سے جاری ظلم و ستم کا سلسلہ ختم ہونا چاہئے۔ انہوں نے کہا کہ جنرل اسمبلی میں پاکستان نے فلسطینی عوام کے ساتھ بھرپور یکجہتی کا اظہار کیا اور فوری جنگ بندی کا مطالبہ کیا۔ شہباز شریف نے اس عزم کا بھی اعادہ کیا کہ پاکستان عالمی سطح پر فلسطین کے حق میں اپنی آواز بلند کرتا رہے گا۔

کشمیر اور پانی کے مسئلے پر بات

شہباز شریف نے کہا کہ جنرل اسمبلی میں مسئلہ کشمیر کو بھرپور انداز میں اجاگر کیا گیا۔ ساتھ ہی پانی کے مسئلے پر بھی عالمی فورم پر آواز بلند کی گئی۔ انہوں نے بتایا کہ سعودی عرب کے دورے میں پاکستان کو بے پناہ عزت دی گئی اور سعودی قیادت نے شاندار استقبال کیا۔

دہشتگردی کے خاتمے کا عزم

وزیراعظم نے کہا کہ دہشتگردی کا چیلنج دوبارہ سر اٹھا رہا ہے لیکن افواج پاکستان اور قانون نافذ کرنے والے ادارے اس کا مکمل خاتمہ کرنے کے لیے سرگرم ہیں۔ انہوں نے کہا کہ خارجی ہاتھ پاکستان کو پھلتا پھولتا نہیں دیکھنا چاہتے مگر دہشتگردوں کا صفایا کرکے دم لیں گے۔

اقتصادی ترقی اور عالمی تعاون

شہباز شریف نے بتایا کہ ایک ہزار زرعی گریجویٹس کو چین میں تربیت کے لیے بھیجا گیا ہے تاکہ زرعی شعبے میں بہتری لائی جا سکے۔ انہوں نے کہا کہ پاکستان قرضوں سے نجات حاصل کرنے کے لیے پرعزم ہے اور صدر ٹرمپ نے یقین دہانی کرائی ہے کہ وہ پاکستان کے ساتھ اقتصادی اور تجارتی شعبوں میں بھرپور تعاون کریں گے۔

شرکائے ملاقات

اس موقع پر نائب وزیراعظم اسحاق ڈار اور وفاقی وزیر اطلاعات عطا تارڑ بھی وزیراعظم کے ہمراہ موجود تھے۔