سیکورٹی کی غیریقینی صورتحال۔۔ پی آئی اے کا کابل کیلئے آپریشن معطل

کابل ایئرپورٹ پر سیکیورٹی کی غیریقینی صورتحال کے باعث پاکستان انٹرنیشنل ایئرلائن نے افغانستان کے لیے آپریشن معطل کردیا۔

قومی ایئرلائن کے ترجمان عبداللہ حفیظ کی جانب سے جاری ایک بیان میں کہا گیا ہے کہ کابل ایئرپورٹ پر مکمل سیکیورٹی ہے اور نہ ہی اسٹاف کی دستیابی ہے۔ اس وقت لوگوں کی بڑی تعداد رن وے پر پہنچ چکی ہے، قومی ایئرلائن نے آپریشن کی معطلی کا فیصلہ وزارت خارجہ کے اعلی حکام اور افغان سول ایوی ایشن سے مشاورت کے بعد کیا۔

پاکستان انٹرنیشنل ایئرلائن کے ترجمان کے مطابق مسافروں، عملے اور اثاثوں کی حفاظت کی خاطر پروازیں غیر معینہ مدت تک کے لیے ملتوی کردی گئی ہیں۔ آج پی آئی اے کی تین پروازوں نے اسلام آباد سے کابل کے لیے روانہ ہونا تھا۔