الیکشن کی ساکھ برقرار رکھنے کا واحد حل ای ووٹنگ،ٹیکنالوجی کااستعمال ہے، وزیراعظم

وزیراعظم عمران خان نے کہا ہے کہ این اے 249 کے ضمنی انتخاب میں کم ٹرن آوٹ کے باوجود تمام جماعتیں دھاندلی کے الزامات لگا رہی ہیں، الیکشن کی ساکھ برقرار رکھنے کا واحد حل الیکٹرانک ووٹنگ مشین اور ٹیکنالوجی کا استعمال ہے۔

وزیراعظم عمران خان نے ٹوئٹر پر اپنے پیغام میں کہا کہ 1970 کے علاوہ، ہر الیکشن میں دھاندلی کا شور ہوا اور نتائج پر سوالات اٹھائے گئے،2013 کے عام انتخابات میں 133 حلقوں پرانتخابی عذرداری کی شکایات سامنے آئیں، ہم نے چار حلقے کھولنے کا مطالبہ کیا، چاروں میں دھاندلی ثابت ہوئی۔

وزیراعظم کا کہنا تھا ہمیں دھاندلی کے خلاف جوڈیشل کمیشن بنوانے میں ایک سال لگا، 126 دن کا دھرنا دینا پڑا، جوڈیشل کمیشن نے 2013 کے انتخابات میں 40 خامیوں کی نشاندہی کی لیکن بدقسمتی سے کوئی ٹھوس انتخابی اصلاحات نہیں کی گئیں۔

عمران خان نے کہا اپوزیشن ہمارے ساتھ بیٹھ کر دستیاب الیکٹرانک ووٹنگ مشینوں کے ماڈل کا انتخاب کرے، ڈونلڈ ٹرمپ نے 2020 کے امریکی الیکشن کو متنازع بنانے کی ہر ممکن کوشش کی، لیکن ٹیکنالوجی کے استعمال کی وجہ سے کوئی انتخابی بے ضابطگی ثابت نہ ہوسکی۔

 وزیراعظم نے کہا ہم ایک سال سے اپوزیشن کو کہہ رہے ہیں کہ انتخابی اصلاحات میں ہمارا ساتھ دیں، ہماری حکومت انتخابی نظام میں اصلاحات لانے کے لیے پرعزم ہے، ٹیکنالوجی کے استعمال سے انتخابی نظام میں شفافیت آئے گی، انتخابات شفاف ہونگے تو ہی جمہوریت مضبوط ہوگی۔