انتخابی دھاندلی روکنے،تارکین وطن کو ووٹ کا حق دینے کیلئے پرعزم ہیں، وزیراعظم

وزیراعظم عمران خان نے کہا ہے کہ انتخابی دھاندلی روکنے اور شفافیت یقینی بنانے کیلئے الیکٹرانک ووٹنگ مشین کا استعمال واحد آپشن ہے۔

ترجمان وزیراعظم آفس کے مطابق وزیراعظم عمران خان کی زیرصدارت ملک میں انتخابی عمل میں الیکٹرانک ووٹنگ مشین کے استعمال اس حوالے سے ضروری قانون سازی کیلئے اب تک ہونے والی پیش رفت پر بریفنگ  دی گئی۔

اس موقع پر وزیراعظم عمران خان نے الیکٹرانک ووٹنگ مشین کے انتخابی عمل میں استعمال میں شفافیت لانے اور تمام آئینی تقاضے پورا کرنےکی ہدایت کی، انہوں نے کہا کہ موجودہ حکومت ملک کے انتخابی عمل میں شفافیت یقینی بنانے کیلئے پرعزم ہے،انتخابی دھاندلی روکنے،شفافیت کیلئےالیکٹرانک ووٹنگ مشین استعمال واحد آپشن ہے۔

وزیراعظم عمران خان کا کہنا تھا کہ اوورسیز پاکستانیز ملک کا قیمتی اثاثہ ہیں ان کو انتخابی عمل میں لازماً شریک کریں گے، انہوں نے ہدایت کی کہ انتخابی اصلاحات، الیکٹرانک ووٹنگ، تارکین وطن کوحق رائے دہی کاعمل جلد مکمل کیا جائے۔