وزیراعظم شہباز شریف کی زائرین کیلئے خصوصی پروازوں کے انتظامات کی ہدایت، سڑک کے ذریعے سفر پر پابندی عائد

اسلام آباد: وزیراعظم شہباز شریف نے اربعین کے موقع پر زائرین کی سہولت کیلئے خصوصی پروازوں کے انتظامات کی ہدایت جاری کر دی ہے تاکہ سفر کے دوران زائرین کو کسی قسم کی دشواری کا سامنا نہ ہو۔

تفصیلات کے مطابق، وزیراعظم شہباز شریف سے وفاقی وزیر داخلہ محسن رضا نقوی نے ملاقات کی جس میں زائرین سے متعلق نئی پالیسی پر بریفنگ دی گئی۔ ملاقات میں بلوچستان کی امن و امان کی صورتحال پر بھی تبادلہ خیال کیا گیا۔

وزیراعظم نے وزیرِ ہوا بازی کو ہدایت دی کہ زائرین کی تعداد میں اضافے کے پیش نظر زیادہ سے زیادہ خصوصی پروازوں کا انتظام کیا جائے تاکہ تمام زائرین کو محفوظ، باوقار اور آرام دہ سفری سہولیات میسر آ سکیں۔

اس موقع پر وزیراعظم نے وزیر داخلہ کو گوادر سیف سٹی منصوبے پر کام تیز کرنے کی بھی ہدایت کی۔

علاوہ ازیں، وفاقی وزیر داخلہ محسن نقوی نے سوشل میڈیا پلیٹ فارم ایکس (Twitter) پر جاری بیان میں کہا کہ وزارت خارجہ، بلوچستان حکومت اور سیکیورٹی اداروں سے وسیع مشاورت کے بعد فیصلہ کیا گیا ہے کہ رواں سال زائرین کو سڑک کے ذریعے عراق اور ایران جانے کی اجازت نہیں دی جائے گی۔

ان کا کہنا تھا کہ یہ مشکل مگر ضروری فیصلہ عوام کے تحفظ اور قومی سلامتی کے وسیع تر مفاد میں کیا گیا ہے۔

محسن نقوی نے بتایا کہ اربعین کے موقع پر زائرین کو صرف ہوائی سفر کی اجازت ہوگی اور حکومت زیادہ سے زیادہ فلائٹس کے انتظام کے لیے اقدامات کر رہی ہے تاکہ زائرین کو آسانی فراہم کی جا سکے۔