پی ٹی آئی نے کبھی کسی صوبے پر چڑھائی نہیں کی: بیرسٹر گوہر

پشاور میں جلسے سے خطاب کرتے ہوئے چیئرمین پاکستان تحریک انصاف بیرسٹر گوہر نے واضح کیا کہ پی ٹی آئی نے کبھی کسی صوبے پر چڑھائی نہیں کی اور نہ ہی ایسا کرنے کا کوئی ارادہ ہے۔ انہوں نے کہا کہ ہری پور الیکشن میں پارٹی کو ایک بار پھر مایوسی کا سامنا کرنا پڑا، تاہم جدوجہد ہر حال میں جاری رہے گی۔

صوبائی قیادت کا مؤقف

وزیراعلیٰ خیبر پختونخوا سہیل آفریدی نے اپنے خطاب میں کہا کہ کچھ عناصر ملک میں آئین و قانون کی بالادستی نہیں چاہتے۔ انہوں نے کہا کہ پی ٹی آئی کی جدوجہد پُرامن رہے گی لیکن پارٹی اپنا حق کسی کو لینے نہیں دے گی۔

 دھاندلی کے الزامات

صوابی میں گفتگو کرتے ہوئے پی ٹی آئی رہنما اسد قیصر نے ہری پور کے ضمنی انتخاب میں شدید دھاندلی کے الزامات لگائے۔ انہوں نے کہا کہ انتخابی عمل کو منظم طریقے سے متنازع بنایا گیا، جس پر پارٹی کو شدید تحفظات ہیں۔

معاشی پالیسیوں پر سخت تنقید

اسد قیصر نے موجودہ معاشی صورتحال پر حکومت کو تنقید کا نشانہ بنایا۔ انہوں نے کہا کہ معاشی پالیسیاں مکمل طور پر ناکام ہوچکی ہیں، جب کہ بے روزگاری کی شرح 7.1 فیصد تک جا پہنچی ہے۔

 تحقیقات کا مطالبہ

پی ٹی آئی رہنما نے آئی ایم ایف کے حالیہ بیان کا حوالہ دیتے ہوئے دعویٰ کیا کہ گزشتہ تین برسوں میں 5300 ارب روپے کی کرپشن ہوئی ہے۔ انہوں نے کہا کہ نیب کو اس مبینہ کرپشن کی آزادانہ تحقیقات کرانی چاہئیں تاکہ حقائق عوام کے سامنے آسکیں۔