وزیراعلیٰ پنجاب مریم نواز شریف کی تھائی لینڈ کی کاروباری برادری کو سرمایہ کاری کی دعوت

وزیراعلیٰ پنجاب مریم نواز شریف کے اعزاز میں تھائی لینڈ کے سابق وزیراعظم اور ٹیلی کمیونیکیشن کے شعبے کی ممتاز کاروباری شخصیت تھکسان شینا وترا کی جانب سے عشائیہ تقریب کا انعقاد کیا گیا۔ اس موقع پر تھائی لینڈ کی تاریخ کی کم عمر ترین سابق خاتون وزیراعظم پائیتونگترن شینا وترا نے بھی شرکت کی۔
تھکسان شینا وترا اور ان کی صاحبزادی نے مریم نواز شریف کا پرتپاک خیر مقدم کیا اور پاکستان مسلم لیگ (ن) کے صدر اور سابق وزیراعظم محمد نواز شریف کے لیے نیک خواہشات اور خیر سگالی کے جذبات کا اظہار کیا۔

مریم نواز کے وژن کی تعریف

تقریب میں دونوں سابق وزرائے اعظم نے مریم نواز شریف کے ترقیاتی وژن، انتظامی اقدامات اور عوامی فلاحی منصوبوں کو سراہا۔ تھکسان شینا وترا نے گفتگو کرتے ہوئے کہا کہ “آپ اور آپ کے والد کی عوامی جدوجہد متاثر کن ہے۔”

پاک-تھائی تعلقات اور باہمی تعاون

وزیراعلیٰ پنجاب مریم نواز شریف نے بھی تھائی قیادت کی عوامی خدمات اور اصلاحات کو سراہتے ہوئے کہا کہ تھائی لینڈ میں متعارف کرائی گئی اصلاحات نے ادارہ جاتی صلاحیت کو مضبوط کیا اور معیشت کو ترقی دی۔ انہوں نے کہا کہ پاکستان اور تھائی لینڈ کی دوستی باہمی احترام، معاشی تعاون اور ثقافتی ہم آہنگی پر مبنی ہے۔

سرمایہ کاری کی دعوت

وزیراعلیٰ پنجاب نے کہا کہ ہم ٹیکسٹائل، زراعت، سیاحت اور ٹیکنالوجی کے شعبوں میں تجارت اور سرمایہ کاری کو فروغ دینا چاہتے ہیں۔ انہوں نے تھائی کاروباری برادری کو دعوت دی کہ وہ پنجاب کی جانب سے فراہم کردہ سرمایہ کاری کے مواقع اور مراعات سے فائدہ اٹھائے، کیونکہ پنجاب سے علاقائی منڈیوں تک رسائی آسان ہے۔

تعلیم، سیاحت اور ڈیجیٹل وژن

مریم نواز شریف نے کہا کہ ثقافتی سفارت کاری، تعلیم اور سیاحت عوام کو قریب لانے کا مؤثر ذریعہ ہیں۔ انہوں نے بتایا کہ پنجاب حکومت “ڈیجیٹل نیشن” کے وژن کے تحت نوجوانوں کو جدید شعبوں میں ہنرمند بنا رہی ہے تاکہ وہ نئے عالمی تقاضوں کے مطابق آگے بڑھ سکیں۔