الیکشن کمیشن نے ملک بھر کے 42کنٹونمنٹ بورڈز میں انتخابات کا شیڈول جاری کردیا

الیکشن کمیشن نے ملک بھر کے 42کنٹونمنٹ بورڈز میں انتخابات کا شیڈول جاری کردیا، کنٹونمنٹ بورڈز میں انتخابات کے لیے پولنگ 12ستمبر کو ہوگی۔

کنٹونمنٹ بلدیاتی انتخابات کا بگل بج گیا،الیکشن کمیشن کی جانب سے شیڈول جاری کردیا گیا،کمیشن کی ضابطہ اخلاق پرپابندی کی ہدایات بھی جاری کر دی گئیں، وزیراعظم، گورنر، وزرائے اعلٰی، وفاقی و صوبائی وزرا ترقیاتی اسکیموں کے اعلانات کے لیے کنٹونمنٹ بورڈز کا دورہ نہیں کرسکیں گے۔

الیکشن کمیشن کیجانب سے جاری نوٹیفکیشن کے مطابق ملک بھر کے کنٹونمنٹ بورڈز میں انتخابات کے لیے پولنگ 12ستمبر کو ہوگی۔ ریٹرننگ افسران 26جولائی سے 29جولائی تک کاغذات نامزدگی وصول کریں گے۔ کاغذات نامزدگی کی جانچ پڑتال 31جولائی سے 3اگست تک ہوگی۔ امیدواروں کی حتمی فہرست 13اگست کو آویزاں کی جائے گی۔

الیکشن کمیشن نے شیڈول جاری ہونے کے بعد سرکاری افسران کے تبادلوں اور تقرریوں پر پابندی لگا دی جس کے مطابق وزیراعظم، گورنر،وزرائے اعلٰی ،وفاقی و صوبائی وزرا کنٹونمنٹ بورڈز کا دورہ نہیں کرسکیں گے، متعلقہ کنٹونمنٹ بورڈز میں کسی قسم کی ترقیاتی اسکیم کا اعلان بھِی نہیں کیا جا سکے گا۔