وزیراعظم شہباز شریف سے مسلم ورلڈ لیگ کے سیکرٹری جنرل کی ملاقات

وزیراعظم پاکستان شہباز شریف سے مسلم ورلڈ لیگ کے سیکرٹری جنرل شیخ ڈاکٹر محمد بن عبدالکریم العیسیٰ نے ملاقات کی، جس میں دونوں رہنماؤں نے لڑکیوں کی تعلیم کے فروغ اور اس حوالے سے عالمی سطح پر مشترکہ اقدامات پر تبادلہ خیال کیا۔

وزیراعظم شہباز شریف نے لڑکیوں کی تعلیم پر ہونے والی بین الاقوامی کانفرنس کی مشترکہ میزبانی میں مسلم ورلڈ لیگ کی حمایت کو سراہا اور اس اشتراک کی پائیداری اور افادیت کو اجاگر کیا۔

ملاقات کے دوران دونوں رہنماؤں نے اتفاق کیا کہ اس کانفرنس سے عالمی سطح پر ایک مضبوط پیغام جائے گا کہ مسلم دنیا لڑکیوں کی تعلیم کو فروغ دینے کے لیے پُرعزم ہے۔ وزیراعظم نے مسلم ورلڈ لیگ کی جانب سے اسلام کے حقیقی تشخص کو فروغ دینے کے لیے عالمی سطح پر کی جانے والی کوششوں کو سراہا۔

وزیراعظم شہباز شریف نے مسلم ورلڈ لیگ کے مقاصد اور اہداف کے لیے پاکستان کی مکمل حمایت کا اعادہ کیا اور اس بات پر زور دیا کہ پاکستان اسلامی تعلیمات اور اقدار کے فروغ کے لیے مسلم دنیا کے ساتھ ہر ممکن تعاون جاری رکھے گا۔

ملاقات کے دوران وزیراعظم نے سیکرٹری جنرل شیخ ڈاکٹر محمد بن عبدالکریم العیسیٰ کا پاکستان میں سیرت میوزیم کے قیام کے فیصلے پر شکریہ ادا کیا۔ انہوں نے امید ظاہر کی کہ مسلم دنیا کے اس اہم منصوبے کو جلد پایہ تکمیل تک پہنچایا جائے گا، جس سے اسلامی تاریخ اور تعلیمات کو بہتر انداز میں پیش کیا جا سکے گا۔