سینیٹ الیکشن خیبرپختونخوا: مشال یوسفزئی ثانیہ نشتر کی خالی نشست پر کامیاب، 86 ووٹ حاصل کیے

خیبرپختونخوا میں سینیٹ کی خالی نشست پر ہونے والے ضمنی انتخاب کے غیر حتمی غیر سرکاری نتائج کے مطابق پاکستان تحریک انصاف (پی ٹی آئی) کی امیدوار مشال یوسفزئی بھاری اکثریت سے کامیاب ہو گئیں۔ انہوں نے سابق سینیٹر ثانیہ نشتر کی خالی کردہ نشست پر کامیابی حاصل کی۔

ریٹرننگ آفیسر کی جانب سے جاری کیے گئے فارم 58 کے مطابق،

مشال یوسفزئی نے 86 ووٹ حاصل کیے

مہتاب ظفر کو 53 ووٹ ملے

صائمہ خالد نے 1 ووٹ حاصل کیا

2 ووٹ مسترد کر دیے گئے

مشال یوسفزئی کی فتح: بانی کا نظریہ جیتا، مجھے نہیں

کامیابی کے بعد میڈیا سے گفتگو کرتے ہوئے نو منتخب سینیٹر مشال یوسفزئی نے کہا کہ یہ میرے لیے بڑا اعزاز ہے، اور میں بانی پی ٹی آئی کی شکر گزار ہوں جن کے نظریے کو ووٹ دیا گیا۔

انہوں نے کہا، “ایم پی ایز نے مجھے نہیں بلکہ بانی کے نظریے کو ووٹ دیا۔ یہ میری نہیں بلکہ نظریہ بانی کی جیت ہے۔”

پارٹی اتحاد اور قیادت کے ساتھ یکجہتی

مشال یوسفزئی نے کہا کہ آج خیبرپختونخوا نے اتحاد کا مظاہرہ کیا، اور وزیراعلیٰ علی امین گنڈا پور سمیت تمام پارٹی رہنما ان کے ساتھ کھڑے رہے۔

انہوں نے مزید انکشاف کیا کہ “ہمارے ایک ایم پی اے کی ہارٹ سرجری ہوئی، تین ووٹ ریجیکٹ ہوئے لیکن ایک بھی ووٹ اپوزیشن کو نہیں گیا۔”

ایک سوال کے جواب میں انہوں نے بتایا کہ ان کی بانی پی ٹی آئی سے پانچ ماہ سے ملاقات نہیں ہوئی۔

پارٹی اور انتخابی پس منظر

یہ نشست سینیٹر ثانیہ نشتر کے استعفے کے بعد خالی ہوئی تھی، جس پر پی ٹی آئی نے مشال یوسفزئی کو ٹکٹ جاری کیا۔ پارٹی نے باقی امیدواروں کو دستبردار ہونے کی ہدایت کی تھی۔

پیپلز پارٹی کی راحیلہ بی بی نے مسلم لیگ (ن) کی امیدوار کے حق میں دستبردار ہو کر ریٹرننگ آفیسر کو باقاعدہ خط بھیجا۔

تاہم، صائمہ خالد نے سینیٹ انتخاب سے دستبردار ہونے سے انکار کرتے ہوئے اپنے تحفظات پارٹی کو آگاہ کر دیے تھے۔