سینیٹ انتخابات کا شیڈول جاری۔۔ 48 سینیٹرز کیلئے الیکشن 3 مارچ کو ہوگا

الیکشن کمیشن آف پاکستان نے سینیٹ انتخابات کا شیڈول جاری کر دیا، پارلیمان کے ایوان بالا کی 48 نشستوں پر الیکشن 3 مارچ کو ہوں گے۔

الیکشن کمیشن کی جانب سے جاری سینیٹ انتخابات کے شیڈول کے مطابق کاغذات نامزدگی  12 تا 13 فروری جمع کرائے جاسکیں گے، امیدواروں کی ابتدائی فہرست 14 فروری کو جاری ہوگی، جب کہ کاغذات نامزدگی کی جانچ پڑتال 15 اور 16 فروری کو ہوگی۔

شیڈول کے مطابق امیدواروں کے کاغذات نامزدگی پر اپیلیں 17 اور 18 فروری کو دائر ہوسکیں گی، امیدواروں کی حتمی فہرست 21 فروری کو جاری ہوگی، اور امیدوار اپنے کاغذات نامزدگی 22 فروری تک واپس لے سکیں گے، چاروں صوبائی اسمبلیاں اور پارلیمنٹ ہاوس کو پولنگ اسٹیشن کا درجہ حاصل ہوگا،

سینیٹ انتخابات کے لئے اسلام آباد کےلیے اسپیشل سیکرٹری الیکشن کمیشن سیکرٹریٹ ظفراقبال حسین ریٹرننگ افسر مقرر کئے گئے، پنجاب  کےلیے صوبائی الیکشن کمشنر غلام اسرار خان ریٹرننگ افسر ہوں گے،سندھ کےلیے صوبائی الیکشن کمشنر اعجاز انور چوہان ریٹرننگ افسر ہوں گے۔ الیکشن کمیشن کے مطابق خیبرپختونخوا کےلیے صوبائی الیکشن کمشنر شریف اللہ ریٹرننگ افسر ہوں گے، بلوچستان کےلیے صوبائی الیکشن کمشنر محمد رازق ریٹرننگ افسر ہوں گے۔