افغانستان میں شراکت اقتدار خانہ جنگی سے بچنے کا واحد راستہ ہے، شاہ محمود قریشی

وزیرخارجہ مخدوم شاہ محمود قریشی نے کہا ہے کہ افغانستان میں خانہ جنگی سے بچاؤ کیلئے شراکت اقتدار ہی واحد راستہ ہے۔

سینیٹ کی قائمہ کمیٹی برائے خارجہ امور کے اجلاس میں اظہار خیال کرتے شاہ محمود قریشی نے کہا کہ پاکستان کی خواہش اور کوشش ہے کہ ہمسایہ ملک دوبارہ خانہ جنگی کا شکار نہ ہو پائے۔ پاکستان چاہتا ہے کہ افغان مہاجرین کی باعزت واپسی کو افغان امن عمل کا حصہ بنایا جائے۔ ہم نے بین الاقوامی کمیونٹی کو باور کروایا کہ آپ مہاجرین کو بھول چکے ہیں۔

ان کا کہنا تھا کہ پاور شیئرنگ سول وار سے بچنے کا راستہ ہے، ٹی ٹی پی کی مضبوطی پاکستان کے مفاد میں نہیں ہے۔ چین اگر افغانستان میں استحکام کیلئے قدم بڑھاتا ہے تو اچھی بات ہے۔ استنبول پراسس میں طالبان نے آنے سے انکار کیا لیکن ہم نے افغانستان اور ترکی کے ساتھ سہ فریقی اجلاس کیا۔

وزیر خارجہ مخدوم شاہ محمود قریشی نے کہا کہ ایران کا افغانستان سے متعلق اہم کردار ہے جسے نظر انداز نہیں کیا جا سکتا۔ پاکستان کے ایران کے ساتھ تعلقات مزید مضبوط ہوئے ہیں۔ ہم ایران کے ساتھ سرحد پر مارکیٹیں قائم کر رہے ہیں، افغانستان میں انخلا کے بعد سول وار کی تشویش جائز ہے۔