حکومت و اپوزیشن نے ثابت کیاکہ قومی مفادات کے تحظ کیلئے سب متحد ہیں، وزیرخارجہ

اسلام آباد: وزیرخارجہ شاہ محمود قریشی کا کہنا ہے کہ پارلیمنٹ کے مشترکہ اجلاس میں موجود حکومتی اور اپوزیشن جماعتوں نے ایک مرتبہ پھر ثابت کر دیاہےکہ قومی مفادات کے تحفظ کیلئے تمام سیاسی جماعتیں ایک ہی موقف کی حامل ہیں۔

وزیرخارجہ شاہ محمود قریشی نے ایف اے ٹی ایف اور کشمیر کے حوالے سے پارلیمنٹ کے مشترکہ اجلاس میں شرکت اور قانون سازی میں معاونت پر مسلم لیگ (ن) کے صدرشہباز شریف اور پاکستان پیپلز پارٹی کے چیئرمین بلاول بھٹو زرداری کا شکریہ ادا کیا ہے۔

وزیر خارجہ نے مسلم لیگ (ن) کے صدر اور اپوزیشن لیڈر شہباز شریف، پاکستان پیپلز پارٹی کے چیئرمین بلاول بھٹو زرداری کو شکریے کے خطوط ارسال کیے، جن میں شاہ محمود قریشی نے لکھا ہے کہ پارلیمنٹ کے مشترکہ اجلاس میں نہ صرف حکومتی بلکہ اپوزیشن جماعتوں نے جس طرح بالغ نظری کا مظاہرہ کیا وہ قابل تحسین ہے۔

 وزیرخارجہ کا کہنا ہے کہ اپوزیشن کے مثبت رویے کی تعریف آن فلور آف دی ہاؤس بھی کر چکے ہیں، پارلیمنٹ میں موجود حکومتی اور اپوزیشن جماعتوں نے ایک مرتبہ پھر ثابت کر دیاہےکہ قومی مفادات کے تحفظ کیلئے پارلیمنٹ میں موجود تمام سیاسی جماعتیں ایک ہی موقف کی حامل ہیں۔

انہوں نے کہا کہ بھارت کی طرف سے مقبوضہ کشمیر میں کیے گئے پانچ اگست 2019 کے غیرآئینی اور یکطرفہ اقدامات کو بھی پارلیمنٹ کی تمام سیاسی جماعتوں نے مشترکہ قرارداد کے ذریعے، متفقہ طور پر مسترد کیا تھا،ہم نے گذشتہ ایک سال میں جموں و کشمیر میں جاری انسانی حقوق کی سنگین خلاف ورزیوں کو دنیا کے ہر فورم پر اٹھایا۔

شاہ محمود قریشی نے کہا کہ گزشتہ ایک سال کے دوران، اقوام متحدہ سیکورٹی کونسل میں تین دفعہ کشمیر کو زیربحث لایا گیا، پچپن سال کے بعد مسئلہ کشمیر پر سیکورٹی کونسل میں مباحثہ ہوا، کشمیر سمیت اہم قومی معاملات پر ہم اپوزیشن کو ساتھ لیکر چلنے کے متمنی ہیں۔

اپنی بات جاری رکھتے ہوئے وزیرخارجہ نے کہا کہ تحریک انصاف کی حکومت اپوزیشن کی جانب سے سامنے آنے والی قابل عمل تجاویز کو ہمیشہ اہمیت دیتی رہے گی اور وہ خود کشمیر پالیسی کے حوالے سے آئندہ کا لائحہ عمل مرتب کرنے کیلئے اپوزیشن جماعتوں سے مثبت تجاویز کے منتظر رہیں گے۔