عوام کے لئے بُری خبر: چینی 17روپے، گھی 90روپے، آٹا7.5 روپے فی کلو گرام مہنگا

مہنگائی کا شکار عوام کی پریشانیوں میں اضافہ کرتے ہوئے حکومت نے آٹا، چینی اورگھی کی قیمتوں میں ایک بار پھر اضافہ کر دیا۔

حکومت نے یوٹیلیٹی اسٹورزپر آٹا، چینی اور گھی کی قیمتیں پھر بڑھا دی، اضافے کے بعد 20 کلو والے آٹے کی قیمت 800 سے بڑھا کرساڑھے 900 روپے ہوگئی۔ آٹے کے دس کلو تھیلے کی قیمت میں 75 روپے اضافہ کیا گیا جس کے بعد 10 کلو گرام والا تھیلا 400 روپے سے بڑھا کر 475 روپے فی کلو کردیا گیا۔

چینی پرفی کلو17 روپے اضافہ کیا گیا، جس کے بعد چینی کی فی کلو قیمت 68 روپے سے بڑھ کر85 روپے ہوگئی۔ حکومت نے سبسڈائز گھی کی قیمت میں بھی 90 روپے فی کلو تک اضافہ کیا جس کے بعد 170 روپے فی کلو والا گھی 260 روپے فی کلوکردیا گیا۔

دوسری جانب عوام کا کہنا ہے کہ اس مہنگائی کے دور میں دو وقت کی روٹی کا حصول بہت مشکل اور حکومت نے مزید مہنگائی کرکے غریب عوام کی زندگی اور مشکل کردی ہے۔