دہشت گردوں کو افغانستان میں محفوظ پناہ گاہیں مل رہی ہیں، آرمی چیف کا انکشاف

آئی ایس پی آر کے مطابق آرمی چیف جنرل سید عاصم منیر نے بنوں کا دورہ کیا، جہاں انہیں جاری آپریشنز اور علاقے کی سکیورٹی صورتحال پر بریفنگ دی گئی۔ آرمی چیف نے سی ایم ایچ بنوں میں زخمی اہلکاروں کی عیادت کی اور ان کی بہادری کو سراہا۔

جوانوں سے خطاب: حوصلے اور بہادری کی ستائش

آرمی چیف نے فوجی جوانوں سے خطاب کرتے ہوئے ان کی بہادرانہ کارروائیوں، غیر متزلزل عزم اور حوصلے کی تعریف کی۔ انہوں نے کہا کہ پاک فوج دہشت گردی کے خلاف سیسہ پلائی دیوار کی طرح کھڑی ہے اور عوام کی حفاظت کو ہر حال میں یقینی بنائے گی۔

افغانستان میں دہشت گردوں کی پناہ گاہوں پر اظہار تشویش

آرمی چیف نے واضح کیا کہ دہشت گرد گروہ بشمول فتنہ الخوارج افغان سرزمین سے کارروائیاں کر رہے ہیں۔ انہوں نے کہا کہ غیر ملکی ہتھیاروں کا استعمال اس بات کا ثبوت ہے کہ افغانستان میں دہشت گردوں کو محفوظ پناہ گاہیں حاصل ہیں۔

انہوں نے خبردار کیا کہ کسی بھی تنظیم کو پاکستان کے امن و استحکام کو خراب کرنے کی اجازت نہیں دی جائے گی۔

دہشت گرد حملوں کے خلاف سخت مؤقف

آرمی چیف نے کہا کہ بے گناہ شہریوں بشمول خواتین، بچوں اور بزرگوں کو نشانہ بنانا دہشت گردوں کے اصل عزائم کو ظاہر کرتا ہے۔ انہوں نے کہا کہ دہشت گردی کے خلاف جنگ میں قومی یکجہتی ضروری ہے۔

شہداء کے خاندانوں سے اظہار افسوس

جنرل عاصم منیر نے دہشت گرد حملے میں شہید ہونے والے شہریوں کے خاندانوں سے گہرے دکھ اور افسوس کا اظہار کیا اور کہا کہ واقعے میں ملوث ملزمان کو فوراً کیفرِ کردار تک پہنچا دیا گیا تھا۔

دہشت گردوں کے سرپرستوں کو انصاف کے کٹہرے میں لانے کا عزم

آئی ایس پی آر کے مطابق آرمی چیف نے دوٹوک الفاظ میں کہا کہ حملے کے منصوبہ سازوں اور معاونین کو بھی جلد انصاف کے کٹہرے میں لایا جائے گا۔

بنوں آمد پر کور کمانڈر پشاور نے آرمی چیف کا استقبال کیا اور انہیں سیکیورٹی امور پر تفصیلی بریفنگ دی۔