“پاک فضائیہ کی جرات اور قربانیاں تاریخ میں سنہری حروف سے لکھی گئی ہیں”: وزیراعظم شہباز شریف

وزیر اعظم محمد شہباز شریف نے یوم فضائیہ کے موقع پر قوم کے نام اپنے خصوصی پیغام میں کہا ہے کہ پاکستان ایئر فورس نے ہمیشہ اپنی پیشہ ورانہ صلاحیتوں، جرات اور قربانیوں کے ذریعے دنیا بھر میں اپنی دھاک بٹھائی ہے۔ انہوں نے کہا کہ ہمیں فخر ہے کہ پاک فضائیہ نے تاریخ کے مختلف ادوار میں اپنی صلاحیتوں کا لوہا منوایا اور حالیہ تاریخ میں معرکہ حق بنیان مرصوص میں دشمن کو فیصلہ کن شکست دے کر دنیا کو حیران کر دیا۔

  جنگ اور لازوال قربانیاں
وزیر اعظم نے کہا کہ یوم فضائیہ ان بہادر شہداء اور غازیوں کی یاد کا دن ہے جنہوں نے 1965 کی پاک بھارت جنگ کے دوران اپنی جانوں کی پرواہ کیے بغیر مادرِ وطن کا دفاع کیا۔ انہوں نے کہا کہ پاک فضائیہ کے ہیروز نے قائداعظم محمد علی جناح کے ویژن کے مطابق ایک ایسی فضائیہ قائم کی جو آج دنیا کی بہترین ایئر فورسز میں شمار ہوتی ہے۔

پاک فضائیہ کی پیشہ ورانہ مہارت
شہباز شریف نے کہا کہ پاک فضائیہ کی بے مثال کارکردگی، اعلیٰ حکمت عملی، جنگی مہارت اور کثیر الجہتی صلاحیتیں اس کے ناقابل تسخیر دفاعی کردار کی عکاس ہیں۔ انہوں نے کہا کہ دنیا کا کوئی بھی دشمن، چاہے وہ کتنا ہی طاقتور اور جدید ہتھیاروں سے لیس کیوں نہ ہو، کبھی بھی جذبے اور قربانیوں کے سامنے نہیں ٹک سکتا۔

قوم کا فخر اور آنے والی نسلوں کے لیے پیغام
وزیر اعظم نے کہا کہ یوم فضائیہ منانے کا مقصد نئی نسل کو یہ یاد دلانا ہے کہ وطن کے تحفظ کے لیے بہادری، عزم اور قربانی بنیادی ستون ہیں۔ انہوں نے کہا: “آج کی پاک فضائیہ ان ہی بہادر سپوتوں کو جیتا جاگتا خراجِ تحسین ہے جنہوں نے اپنی جانوں کا نذرانہ دے کر فضائی تاریخ رقم کی۔ مجھے یقین ہے کہ ہماری ایئر فورس ہمیشہ کی طرح ملک کی خودمختاری، زمینی حدود اور علاقائی سالمیت کا بھرپور دفاع کرتی رہے گی۔”