پنجاب میں تاریخ کا سب سے بڑا ریسکیو اینڈ ریلیف آپریشن، وزیراعلیٰ مریم نوازشریف کی براہ راست نگرانی

وزیراعلیٰ پنجاب مریم نوازشریف کی ہدایت پر صوبے بھر میں سیلاب متاثرین کے لیے گرینڈ ریسکیو اینڈ ریلیف آپریشن جاری ہے۔ پنجاب کی تاریخ میں 38 سال بعد پہلی بار تین بڑے دریاؤں — راوی، ستلج اور چناب — میں آنے والے سیلاب کے باعث غیر معمولی ریسکیو آپریشن شروع کیا گیا، جس کے تحت لاکھوں متاثرین کو ریلیف فراہم کیا جا رہا ہے۔

متاثرہ علاقے اور آبادی

سیلاب سے پنجاب کے 769 موضع جات کے 6 لاکھ ایک ہزار 126 شہری متاثر ہوئے ہیں۔ دریائے چناب کے کنارے آباد 333 موضع جات میں ڈیڑھ لاکھ سے زائد افراد متاثر ہوئے، دریائے راوی کے کنارے 101 موضع جات کے 70 ہزار سے زائد لوگ متاثر ہوئے جبکہ دریائے ستلج کے کنارے 335 موضع جات میں 3 لاکھ 80 ہزار 768 افراد متاثر ہوئے۔ متاثرہ اضلاع میں قصور، ننکانہ، نارووال، اوکاڑہ، پاکپتن، سیالکوٹ، وزیرآباد، گجرات، منڈی بہاﺅالدین، چنیوٹ، جھنگ، ملتان، وہاڑی، بہاولنگر اور بہاولپور شامل ہیں۔

ریلیف اور میڈیکل کیمپ

سیلاب متاثرین کے لیے 263 ریلیف کیمپ اور 161 میڈیکل کیمپ قائم کر دیے گئے ہیں جہاں خوراک، علاج اور عارضی پناہ گاہیں فراہم کی جا رہی ہیں۔ دریائے راوی کے متاثرہ علاقوں میں 81 ریلیف کیمپ اور 28 میڈیکل کیمپ، دریائے چناب کے متاثرہ علاقوں میں 78 ریلیف کیمپ اور 28 میڈیکل کیمپ جبکہ دریائے ستلج کے کنارے 104 ریلیف کیمپ اور 105 میڈیکل کیمپ فعال ہیں۔

ہنگامی اقدامات

ہسپتالوں میں ایمرجنسی نافذ کر دی گئی ہے اور تمام عملے کی چھٹیاں منسوخ کر دی گئی ہیں تاکہ متاثرین کو فوری طبی سہولت فراہم کی جا سکے۔ سیلاب زدہ علاقوں میں خوراک، پانی اور دیگر ضروری اشیاء کی فراہمی کا سلسلہ بھی جاری ہے۔

فوج اور اداروں کا تعاون

ریسکیو آپریشن میں پاک فوج، ضلعی انتظامیہ، پولیس، ریسکیو 1122، پی ڈی ایم اے اور دیگر ادارے مشترکہ طور پر حصہ لے رہے ہیں۔ دیہی علاقوں میں پالتو جانوروں کو بھی کشتیوں کے ذریعے محفوظ مقامات پر منتقل کیا جا رہا ہے۔ بے گھر ہونے والے خاندانوں کو عارضی پناہ گاہوں میں منتقل کرنے کا عمل تیزی سے جاری ہے۔

وزیراعلیٰ کا عزم

وزیراعلیٰ پنجاب مریم نواز نے کہا ہے کہ سیلاب سے متاثرہ ہر خاندان کی بحالی ان کا مشن ہے اور بے گھر ہونے والے افراد کی مکمل بحالی تک ان کی بھرپور مدد کی جائے گی۔ انہوں نے پاک فوج، ریسکیو اداروں اور انتظامیہ کے افسروں اور جوانوں کی خدمات کو خراج تحسین پیش کیا۔