ذوالحج کا چاند نظر نہیں آیا، عیدالاضحیٰ پاکستان میں 7 جون بروز ہفتہ کو منائی جائے گی

اسلام آباد: چیئرمین مرکزی رویت ہلال کمیٹی مولانا سید عبدالخبیر آزاد کی زیر صدارت ذوالحج کے چاند کی رویت کے لیے مرکزی اجلاس کوہسار بلڈنگ میں منعقد ہوا۔ اجلاس میں مرکزی رویت ہلال کمیٹی کے اراکین کے ساتھ محکمہ موسمیات، سپارکو اور دیگر متعلقہ اداروں کے نمائندگان نے شرکت کی۔

اس موقع پر ملک بھر میں زونل کمیٹیوں کے اجلاس بھی کراچی، لاہور، کوئٹہ، پشاور سمیت مختلف شہروں میں ہوئے، تاہم کہیں سے بھی چاند نظر آنے یا اس کی شہادت کی کوئی اطلاع موصول نہیں ہوئی۔

قبل ازیں محکمہ موسمیات اور سپارکو نے پیش گوئی کی تھی کہ 28 مئی کی شام چاند کی عمر صرف 11 گھنٹے ہوگی، جو فلکیاتی اصولوں کے مطابق رویت کے لیے ناکافی ہے۔ اسی بنیاد پر ماہرین فلکیات نے بھی چاند نظر آنے کے امکانات کو انتہائی کم قرار دیا تھا۔

یاد رہے سپارکو نے پہلے ہی پیش گوئی کی تھی کہ یکم ذوالحج 29 مئی بروز جمعرات کو ہوگی، جو درست ثابت ہوئی۔

دوسری جانب عرب میڈیا رپورٹس کے مطابق انڈونیشیا میں ذوالحج کا چاند نظر آ گیا ہے اور وہاں ذوالحج کا آغاز 28 مئی بروز بدھ سے ہو چکا ہے، جبکہ عیدالاضحیٰ 6 جون 2025 کو منائی جائے گی۔

عرب میڈیا کے مطابق برونائی دارالسلام اور ملائیشیا میں چاند نظر نہیں آیا، جس کے باعث ان دونوں ممالک میں عیدالاضحیٰ 7 جون 2025 بروز ہفتہ کو منائی جائے گی۔

پاکستان میں بھی چاند نظر نہ آنے کی بنیاد پر امکان ہے کہ عیدالاضحیٰ 7 جون بروز ہفتہ کو منائی جائے گی۔ سرکاری اعلان مرکزی رویت ہلال کمیٹی کی جانب سے جلد متوقع ہے۔