وقت آگیا ہے نظامِ عدل اپنی توجہ قانون شکنوں اور مجرم اشرافیہ پر مرکوز کرے، عمران خان

 اسلام آباد : سابق وزیراعظم عمران خان نے کہا ہے کہ مافیاز نے اپنے تسلط کے دوام کیلئے ادارے تباہ، ملک میں لاقانونیت کو فروغ دیا۔ وقت آگیا ہے کہ نظامِ عدل اپنی توجہ بارسوخ قانون شکنوں اور مجرم اشرافیہ پر مرکوز کرے۔ وکلاء برادری ملک میں قانون کی بالادستی کیلئے آگے بڑھے اور کردار ادا کرے۔

ملک بھر کی اہم بار ایسوسی ایشنز کے صدور کی چیئرمین پاکستان تحریک انصاف عمران خان سے خصوصی ملاقات ہوئی ۔ ملاقات کرنے والوں میں لاہور بار، فیصل آباد بار، سرگودھا بار سمیت پنجاب کی دیگر ڈسٹرکٹ بار ایسوسی ایشنز کے صدور شامل تھے۔ اسلام آباد ہائیکورٹ بار ایسوسی ایشن کے صدر شعیب شاہین بھی ملاقات کرنے والوں میں شامل تھے۔

ملاقات میں ملک میں آئین و قانون کی بالادستی کے حوالے سے چیئرمین عمران خان کے ویژن اور تحریک انصاف کی کاوشوں کو خراج تحسین پیش کیا گیا۔ ملک میں قانون کی عملدراری، ریاستی اداروں کے مابین اختیارات کی دستوری تقسیم اور جمہوری اقدار کی کیفیت کا بھی جائزہ لیا گیا۔اس موقع پر مقتدر سیاسی اتحاد کی جانب سے عدالت عظمیٰ کے ججز کیخلاف نفرت آمیز مہم پر گہری تشویش کا اظہار کیا گیا۔ ملاقات میں دستور و جمہوریت کی بقاء و استحکام کیلئے اشتراکِ عمل کی مختلف جہتوں پر بھی تبادلہ خیال کیا گیا ۔

سابق وزیراعظم عمران خان نے کہا کہ قانون کی حکمرانی قومی ترقی کے ایجنڈے کا بنیادی نکتہ ہے۔ تحریک انصاف عدل و انصاف کے قیام کیلئے گزشتہ 26 سال سے سیاسی میدان میں متحرک ہے۔ عمران خان کا کہنا تھا کہ طاقتور اور کمزور کو یکساں طور پر قانون کے تابع کئے بغیر اس سماج کیا قیام ممکن نہیں جس کا خواب ہمارے آباء نے دیکھا۔مافیاز نے اپنے تسلط کے دوام کیلئے ادارے تباہ، ملک میں لاقانونیت کو فروغ دیا۔ عمران خان نے کہا کہ وقت آگیا ہے کہ نظامِ عدل اپنی توجہ بارسوخ قانون شکنوں اور مجرم اشرافیہ پر مرکوز کرے۔ وکلاء برادری ملک میں قانون کی بالادستی کیلئے آگے بڑھے اور کردار ادا کرے۔