راولپنڈی اور اسلام آباد میں طوفانی بارش، نالہ لئی میں خطرناک صورتحال، ایک دن کی چھٹی کا اعلان

اسلام آباد/راولپنڈی: جڑواں شہروں میں گزشتہ رات سے جاری موسلا دھار بارش نے نظامِ زندگی درہم برہم کر دیا۔ راولپنڈی اور اسلام آباد میں 230 ملی میٹر سے زائد بارش ریکارڈ کی گئی، جس کے نتیجے میں نشیبی علاقے زیر آب آ گئے، نالہ لئی میں پانی کی سطح خطرناک حد تک بلند ہو گئی، اور قریبی آبادیوں کے لیے خطرے کے سائرن بجا دیے گئے۔

نالہ لئی میں خطرے کی گھنٹیاں، انخلا کی وارننگ جاری

راولپنڈی کے نالہ لئی میں پانی کی سطح کٹاریاں کے مقام پر 20 فٹ جبکہ گوالمنڈی پل پر 19 فٹ تک پہنچ گئی، جس کے باعث خطرے کی وارننگ جاری کر دی گئی ہے۔ دریائے سواں میں بھی پانی کی سطح بلند ہونے سے متعدد پل زیر آب آ گئے ہیں۔

ریسکیو، واسا، سول ڈیفنس اور دیگر اداروں کو ہائی الرٹ پر رکھ دیا گیا ہے۔ نالہ لئی کے اطراف میں خطرے کے سائرن بجا دیے گئے ہیں اور شہریوں کو محفوظ مقامات پر منتقل ہونے کی ہدایت جاری کر دی گئی ہے۔

ٹریفک نظام متاثر، شہری مشکلات کا شکار

بارش کے باعث جڑواں شہروں میں کئی نشیبی علاقے زیر آب آ گئے ہیں، جس سے ٹریفک کی روانی شدید متاثر ہوئی ہے۔ راولپنڈی کے علاقے ڈھوک کھبہ میں پانی جمع ہونے سے شہریوں کو خاصی مشکلات کا سامنا کرنا پڑا۔

فوج سے مدد طلب، ایمرجنسی الرٹ جاری

ایم ڈی واسا نے نالہ لئی اور دیگر متاثرہ علاقوں میں ایمرجنسی کی صورت میں پاک فوج سے مدد لینے کے لیے ٹرپل ون بریگیڈ سے رابطہ کیا ہے۔ شہریوں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی گئی ہے۔

جہلم میں بھی صورتحال تشویشناک، ضلعی انتظامیہ متحرک

جہلم میں بھی شدید بارشوں کے باعث ندی نالوں میں طغیانی آ گئی ہے۔ ضلعی انتظامیہ نے ممکنہ سیلابی صورتحال کے پیشِ نظر فوج سے مدد طلب کر لی ہے، اور متاثرہ علاقوں میں ریسکیو آپریشن جاری ہے۔

ضلع راولپنڈی میں ایک دن کی چھٹی کا اعلان

بارش اور ممکنہ سیلابی خطرے کے پیش نظر ضلع راولپنڈی میں آج ایک دن کی عام تعطیل کا اعلان کیا گیا ہے۔ ڈپٹی کمشنر راولپنڈی نے نوٹیفکیشن جاری کرتے ہوئے شہریوں سے اپیل کی ہے کہ وہ گھروں میں رہیں اور غیر ضروری طور پر باہر نہ نکلیں۔