جنوبی وزیرستان اور کاغان میں دو دھماکے، دو جاں بحق، 21 زخمی

جنوبی وزیرستان کے علاقے وانا بازار میں شکئی سٹینڈ کے پاس زور دار دھماکا اس وقت ہوا جب پولیس وین گزر رہی تھی۔ دھماکے میں دو افراد جاں بحق جبکہ 14 افراد زخمی ہو گئے، جن میں دو پولیس اہلکار بھی شامل ہیں۔

زخمیوں کو فوری طور پر وانا ہیڈکوارٹر ہسپتال منتقل کر دیا گیا

پولیس حکام کے مطابق ریموٹ کنٹرول بم کے ذریعے کارروائی کی گئی۔ علاقے میں دھماکے کے بعد فائرنگ بھی سنی گئی، جس کے بعد سکیورٹی فورسز کی بھاری نفری تعینات کر دی گئی اور شواہد اکٹھے کیے جا رہے ہیں۔

ڈی پی او طاہر شاہ نے علاقے میں سکیورٹی الرٹ جاری کر دیا

حکام کے مطابق ابتدائی شواہد دہشت گردی کی جانب اشارہ کرتے ہیں، تاہم مکمل تحقیقات جاری ہیں۔

کاغان کے قریب پھاگل بازار میں سلنڈر دھماکا، بچے بھی زخمی

دوسری جانب خیبرپختونخوا کے علاقے کاغان کے قریب پھاگل بازار میں گیس سلنڈر دھماکے میں بچوں سمیت سات افراد زخمی ہو گئے۔ ریسکیو حکام کا کہنا ہے کہ دھماکا ایک دکان میں ہوا جس کی زد میں سکول جاتے بچے بھی آ گئے۔

زخمیوں کو فوری طور پر بالاکوٹ ہسپتال منتقل کیا گیا

ریسکیو ٹیموں نے موقع پر پہنچ کر زخمیوں کو ہسپتال منتقل کیا، جہاں انہیں طبی امداد فراہم کی جا رہی ہے۔