پاکستان امریکا کے ساتھ طویل المدتی،پائیدار شراکت داری چاہتاہے، آرمی چیف

پاک فوج کے سربراہ جنرل قمر جاوید باجوہ نے کہا ہے کہ پاکستان امریکا کے ساتھ طویل المدتی، کثیرالجہتی اور پائیدار شراکت داری کا خواہاں ہے۔

مسلح افواج کے شعبہ تعلقات عامہ کی جانب سے جاری بیان کے مطابق آرمی چیف جنرل قمر جاوید باجوہ سے پاکستان میں امریکی سفارت خانے کی ناظم الامور انجیلا ایگلر نے جی ایچ کیو راولپنڈی میں ملاقات کی۔جس میں باہمی دلچسپی کے امور، علاقائی سیکیورٹی کی صورتحال پر تبادلہ خیال کیا گیا، ملاقات میں افغانستان کی موجودہ صورتحال پر بھی گفتگو کی گئی۔ ملاقات میں مختلف شعبہ جات میں باہمی تعاون پر بھی تبادلہ خیال کیا گیا۔

آئی ایس پی آر کے مطابق ملاقات کے دوران آرمی چیف جنرل قمر جاوید باجوہ نے کہا کہ پاکستان باہمی تعلقات کو جاری رکھنے کا خواہش مند ہے، پاکستان امریکا کے ساتھ طویل المدتی، کثیرالجہتی اور پائیدار شراکت داری چاہتا ہے۔ امریکی ناظم الامور نے افغان امن عمل اور خطے میں امن کے لیے بھی پاکستان کی مخلصانہ کوششوں کو سراہا۔