ارشد شریف کیس میں سونے کی اسمگلنگ کی تحقیقات کی جائیں گی، وزیرداخلہ

اسلام آباد : وزیر داخلہ رانا ثنا اللہ نے کہا ہے کہ سینئرصحافی ارشد شریف کے قتل سے متعلق حقائق جاننے کیلئے اعلیٰ سطح کی 3 رکنی تحقیقاتی ٹیم تشکیل دے دی ہے۔ٹیم ایک سیاسی شخصیت کے اعتراف کے بعد ارشد شریف کو پاکستان سے دبئی اورپھر سے کینیا جانے پر مجبور کرنے کے عوامل کا بھی جائزہ لے گی۔

رانا ثنا اللہ کا کہنا ہے کہ تحقیقاتی ٹیم کیس میں پاکستان کے ایک نجی چینل سے منسلک شخصیت کے کینیا میں سونے کی سمگلنگ کے کاروبار سےمتعلق قائم کمپنی کے کردارکا جائزہ بھی لے گی۔ٹیم ایف آئی اے اورانٹیلی ایجنسیز کے اعلی افسران پرمشتمل ہے۔

تحقیقاتی ٹیم فوری طور پرکینیا روانہ ہوگی اورارشد شریف قتل کیس کی تحقیقات کرے گی۔تحقیقاتی ٹیم کینیا پولیس اور دیگر ذرائع سے حاصل شدہ معلومات اور شواہد کی روشنی میں اپنی ایک آزادانہ رپورٹ مرتب کرکے وزارت داخلہ کو پیش کرے گی۔