زیلنسکی کی روم میں امریکی نائب صدر جے ڈی وینس اور وزیر خارجہ مارکو روبیو سے ملاقات

روم: یوکرین کے صدر ولادیمیر زیلنسکی نے روم میں امریکی نائب صدر جے ڈی وینس اور وزیر خارجہ مارکو روبیو سے اہم ملاقات کی، جو حالیہ دنوں وائٹ ہاؤس میں جھگڑے کے بعد دونوں امریکی رہنماؤں کی پہلی مشترکہ سفارتی سرگرمی تھی۔

یہ ملاقات امریکی سفیر کی رہائش گاہ پر بند دروازوں کے پیچھے ہوئی، جس میں زیلنسکی کے چیف آف اسٹاف اینڈری یرماک بھی شریک تھے۔ زیلنسکی نے “ایکس” پر ایک بیان میں واضح کیا کہ ملاقات کے دوران استنبول مذاکرات سمیت سفارتی کوششوں پر تبادلہ خیال کیا گیا، جہاں روس نے ایک غیر مؤثر اور محدود اختیارات رکھنے والا وفد بھیجا تھا۔

زیلنسکی نے بتایا کہ انہوں نے امریکی حکام کو یقین دہانی کرائی کہ یوکرین جنگ کے خاتمے کے لیے “حقیقی سفارت کاری” کے لیے تیار ہے، اور ایک “مکمل اور غیر مشروط جنگ بندی” کی اشد ضرورت پر زور دیا۔

امریکی رہنماؤں وینس اور روبیو نے بھی اس بات پر زور دیا کہ روس پر دباؤ برقرار رکھنا ناگزیر ہے جب تک وہ جنگ روکنے کے لیے آمادہ نہ ہو جائے۔ ملاقات میں روس پر پابندیاں، دو طرفہ تجارتی تعلقات، دفاعی اشتراک، جنگی صورتحال، اور ممکنہ قیدیوں کے تبادلے جیسے موضوعات پر بھی بات ہوئی۔

ملاقات کو علاقائی اور عالمی امن کی بحالی کے لیے ایک اہم پیش رفت تصور کیا جا رہا ہے، جبکہ فریقین نے مشترکہ اقدامات کے ذریعے ایک پائیدار اور منصفانہ امن کے قیام پر اتفاق کیا۔