ملک میں کوئی اقتصادی بحران نہیں ہے، وفاقی وزیر خزانہ

اسلام آباد: وفاقی وزیرخزانہ اسد عمر نے ملک میں اقتصادی بحران ہونے کا تاثر مسترد کردیا ہے۔

اسلام آباد میں ایس ڈی پی آئی کے زیر اہتمام منعقدہ کانفرنس سے خطاب کرتے ہوئے وزیرخزانہ اسد عمر نے کہا کہ ملک کی برآمدات بڑھ رہی ہیں، درآمدات و کرنٹ اکاؤنٹ خسارہ کم ہو رہا ہے اور ملک میں کوئی اقتصادی بحران نہیں۔

ان کا کہنا تھا کہ لوگوں کو غربت سے نکالنے کے لئے انٹرا ریجنل ٹریڈ کی ضرورت ہے، بین الاقوامی تجارت کیلئے سیاسی گنجائش دے سکتے ہیں، پاکستان کے پاس آج ایک رہنما ہے جو رسک لیتا اور سخت فیصلے کرنے کی جرات رکھتا ہے۔

اسد عمر نے امید ظاہر کی کہ ایس ڈی پی آئی کانفرنس میں مسائل کا کوئی حل نکلے گا اور تجاویز دی جائیں گی۔ انہوں نے کہا کہ ڈالر کی قیمت کے حوالے سے ہمارے منشور کا حصہ ہے کہ  شرح مبادلہ کا فیصلہ اسٹیٹ بینک کرے گا، میں نے گورنر اسٹیٹ بینک کو اس معاملے کی کمیونیکشن بہتر کرنے کیلئے کہا ہے، وزیراعظم عمران خان نے بھی ہدایات جاری کی ہیں۔