بلوچستان میں بارودی مواد پھٹنے سے پاک فوج کے 2 افسر شہید

راولپنڈی : بلوچستان کے علاقے کوہلو میں دہشتگردوں کیخلاف آپریشن کے دوران بارودی مواد پھٹنے سے پاک فوج کے 2 افسر شہید ہو گئے۔

آئی ایس پی آر کے مطابق میجر جواد اور کیپٹن صغیر کوہلو میں خفیہ معلومات پر ہونے والے خفیہ آپریشن میں شریک تھے کہ اس دوران بارودی مواد پھٹ گیا جس کی زد میں آکر دونوں افسر شہید ہو گئے۔

ترجمان پاک فوج کا کہنا ہے کہ علاقے میں دہشتگردوں اور امن دشمنوں کی تلاش کیلئے آپریشن جاری ہے، ایسی بزدلانہ کارروائیوں سے بلوچستان کے امن اور خوشحالی کو سبوتاژ نہیں کیا جا سکتا۔

ترجمان پاک فوج کا کہنا تھا کہ سکیورٹی فورسز اپنے خون اور جان کی قیمت پر بھی دشمنوں کے ناپاک عزائم پورے نہیں ہونے دیں گی۔