خیبرپختونخوا کو انسداد دہشتگردی کیلئے417 ارب روپے دیئے ، کہاں گئے، شہباز شریف

اسلام آباد : وزیراعظم شہباز شریف نے خیبرپختونخوا میں پی ٹی آئی کی حکومت سے سوال کرتے ہوئے کہا ہے کہ خیبر پختونخوا کو انسداد دہشتگردی کیلئے 417 ارب روپے دیئے گئے، ان کا حساب دیا جائے کہ وہ کہاں خرچ کیے گئے؟۔

وفاقی کابینہ کے اجلاس میں گفتگو کرتے ہوئے وزیراعظم شہباز شریف نے کہا کہ پشاور دھماکہ افسوسناک ہے، خیبر پختونخوا میں 10 سال پی ٹی آئی کی حکومت رہی، گزشتہ 10 سال میں وفاق کی جانب سے 417 ارب روپے خیبرپختونخوا کو ادا کیے جاچکے ہیں، 417 ارب روپے کہاں استعمال ہوئے؟ کہا جاتا ہےکہ ہمیں پیسے نہیں ملے لیکن انہیں سالانہ 40 ارب ملے، وہ پیسے کہاں گئے؟

وزیراعظم شہباز شریف کا کہنا تھا کہ یہ پیسہ خیبر پختونخوا کی پولیس اور سکیورٹی فورسز کی بہتری کے لئے استعمال ہونا تھا، خیبرپختون خوا کوسالانہ 40 ارب روپے ملے،کسی اور صوبے کو اتنے نہیں ملے۔ نیکٹا بنایا گیا،سی ٹی ڈی بنائی گئی،پھر بھی پیسہ کہاں خرچ ہوا، کے پی کے سیاسی خاندانوں نے دہشت گردی کے خلاف جنگ میں قربانیاں دیں۔

وزیراعظم شہباز شریف نے کہا کہ پشاور سے کراچی تک ہر آنکھ اشکبار ہے، دہشتگردی کا یہ ناسور دوبارہ سر اٹھا رہا ہے، سوال پیدا ہوتا ہے،ان کو کون واپس لے کر آیا، دوبارہ پاکستان کا امن خراب ہوا، کس طرح کے پی دہشتگردوں کے ہاتھ میں چلا گیا، اگر ہم نے فوری اقدامات نہ کیے تو یہ پاکستان کے دوسرے علاقوں میں دوبارہ پھیل جائے گا ، ہم اس پر دوبارہ قابو پائیں گے۔

شہبا شریف کا کہنا تھا کہ دہشتگردوں کے خلاف قوم اور ادارے متحد اور ایک آوازہیں ، بہادر اور غیور عوام کی ہمت کو الفاظ میں بیان نہیں کرسکتے۔