9 مئی واقعات: وفاقی کابینہ کی قومی سلامتی کمیٹی کے فیصلوں کی توثیق

اسلام آباد : وفاقی کابینہ نے 16 مئی کو ہونے والے قومی سلامتی کمیٹی کے فیصلوں کی توثیق کر دی۔
وزیراعظم شہباز شریف کی زیر صدارت وفاقی کابینہ کا اجلاس ہوا جس میں 16 مئی کو ہونے والے قومی سلامتی کمیٹی کے فیصلوں کی توثیق کی گئی۔ اعلامیہ کے مطابق وزیراعظم شہباز شریف نے کابینہ کے ارکان کو دورہ ایران پر بریفنگ دیتے ہوئے کہا کہ ایران کے ساتھ مختلف شعبوں میں تعاون بڑھانے کے خواہاں ہیں۔ 900 کلومیٹر طویل پاک۔ایران سرحد پر سیکورٹی میں مزید بہتری پر اتفاق ہوا ہے۔وزیراعظم شہباز شریف نے کہا کہ ایران سے کم لاگت بجلی کی درآمد سے بلوچستان کے دور دراز علاقوں میں ترقی و خوشحالی آئے گی، پیٹرول و ڈیزل کی قیمتوں میں کمی کے اثرات کو فوری طور پر عوام تک پہنچایا جائے، وزارتِ داخلہ اور ملک بھر میں ضلعی انتظامیہ دیگر اشیاء کی قیمتوں میں کمی یقینی بنائے۔
وزیراعظم کا کہنا تھا کہ ناجائز منافع خوروں کے خلاف سختی سے ایکشن لیا جائے،پیٹرول اور ڈیزل کی قیمتوں میں تقریباً 11 فیصد کمی کے تناسب سے کرائیوں اور اشیاء ضروریہ و خورونوش کی قیمتوں میں کمی یقینی بنائی جائے۔

وزیراعظم شہباز شریف نے مزید کہا کہ ”روڈ ٹو مکہ“ منصوبے سے پاکستانی عازمین حج کو حج کی بہترین سہولیات میسر ہوں گی۔ اجلاس میں راولپنڈی میں انشورنس ٹریبونل قائم کرنے کی منظوری بھی دی گئی۔