ملک بھر میں بارشوں کا نیا سلسلہ 9 ستمبر سے شروع ہوگا، محکمہ موسمیات

اسلام آباد : محکمہ موسمیات نے ملک کے بالائی اور وسطی علاقوں میں مزید بارش کی پیشگوئی کر دی۔ بارشوں کا سلسلہ دس ستمبر سے چودہ ستمبر تک وقفے وقفے سے جاری رہے گا۔

محکمہ موسمیات کے مطابق مغربی ہواؤں کا سلسلہ ملک کے بالائی علاقوں میں داخل ہوگا۔ 10 ستمبر سے 14 ستمبر کے دوران کشمیر، گلگت بلتستان ،اسلام آباد، راولپنڈی، مری ، اٹک ،چکوال ،جہلم ،لاہور ، گوجرانوالہ ،گجرات ،فیصل آباد، میں بارش کی توقع ہے،چترال دیر، سوات، مانسہرہ ،کوہستان ،ایبٹ آباد، ہری پور، پشاور ، مردان ، نوشہرہ ،صوابی میں بھی  بارش کا امکان  ہے

محکمہ موسمیات کے مطابق 13 سے 14 ستمبر کے دوران بکھر، لیہ، ڈی جی خان اور مظفر گڑھ میں گرج چمک کے ساتھ بارش کی توقع ہے جبکہ تھرپارکر، عمر کوٹ ، سانگھڑ ، بدین ، میرپور خاص، ٹھٹھہ میں بعض مقامات پر گرج چمک کے ساتھ بارش ہو سکتی ہے۔

محکمہ موسمیات کا کہنا ہے کہ بارشوں کے باعث کشمیر، گلگت بلتستان، گلیات ،مری اور خیبرپختونخوا کے پہاڑی علاقوں میں لینڈ سلائیڈنگ کا خدشہ ہے۔